hur-o-ghilman ke talabgar se waqif main hun

hūr-o-ġhilmāñ ke talabgār se vāqif maiñ huuñ

sāhab-e-jubba-o-dastār se vāqif maiñ huuñ

shahr meñ aap farishtoñ se bhī baḌh kar Thahre

haañ magar aap ke kirdār se vāqif maiñ huuñ

haq-navā.ī kā samajhtā huuñ ise maiñ in.aam

qaid-o-zindāñ rasan-o-dār se vāqif maiñ huuñ

vo hai majbūr talab se bhī sivā dene par

ḳhūbī-e-jur.at-e-iz.hār se vāqif maiñ huuñ

munsifī chūmtī rahtī hai dar-e-ahl-e-dil

ai adālat tire kirdār se vāqif maiñ huuñ

sar salāmat hai to rauzan bhī banā lūñgā maiñ

habs tere dar-o-dīvār se vāqif maiñ huuñ

kibr-o-naḳhvat kā hai ilzām abas 'anjum' par

us ke iḳhlās se afkār se vāqif maiñ huuñ

hur-o-ghilman ke talabgar se waqif main hun

sahab-e-jubba-o-dastar se waqif main hun

shahr mein aap farishton se bhi baDh kar Thahre

han magar aap ke kirdar se waqif main hun

haq-nawai ka samajhta hun ise main inam

qaid-o-zindan rasan-o-dar se waqif main hun

wo hai majbur talab se bhi siwa dene par

KHubi-e-jurat-e-izhaar se waqif main hun

munsifi chumti rahti hai dar-e-ahl-e-dil

ai adalat tere kirdar se waqif main hun

sar salamat hai to rauzan bhi bana lunga main

habs tere dar-o-diwar se waqif main hun

kibr-o-naKHwat ka hai ilzam abas 'anjum' par

us ke iKHlas se afkar se waqif main hun