huzur-e-ghair tum ushshaq ki tahqir karte ho

huzūr-e-ġhair tum ushshāq kī tahqīr karte ho

mohabbat karne vāloñ kī yahī tauqīr karte ho

abas tum ḳhvāhish-e-vasl-e-but-e-be-pīr karte ho

jo qismat meñ nahīñ hai us kī kyā tadbīr karte ho

zamīn-o-āsmāñ kā farq hai ḳhurshīd-o-zarre meñ

muqābil chāñd se kyā yaar kī tasvīr karte ho

dam-e-āḳhir laḌe vahshī ke zindāñ meñ ye ġhul hogā

sitam karte ho vīrāñ ḳhāna-e-zanjīr karte ho

jo mujh saudā-zada ne kī kabhī tashrīh zulfoñ kī

to bole hañs ke kyā uljhī huī taqrīr karte ho

musāfir ke liye hai fikr-e-gor ai mun.imo lāzim

imārat kyā sarā-e-dahr meñ ta.amīr karte ho

sahar tak niiñd uḌ jaatī hai ham-sā.e kī to be-shak

asar kyā ḳhaak aur ai nāla-e-shab-gīr karte ho

jo mashq-e-harf-e-lā kartā huuñ kahte haiñ daqīqa-ras

muamā-e-dahān-e-yār kyā tahrīr karte ho

abas dil toḌ kar yād-e-butāñ meñ mahv ho itnā

ḳhudā ke ghar ko Dhā kar but-kada ta.amīr karte ho

hamāre ba.ad aaoge to kyā ai nāma-bar kahnā

ham āḳhir hote haiñ aane meñ tum tāḳhīr karte ho

ḳhat-o-ruḳh kī sifat meñ raT lagī rahtī hai jo tum ko

'qalaq' kyā hifz qur.āñ kā ma-e-tafsīr karte ho

huzur-e-ghair tum ushshaq ki tahqir karte ho

mohabbat karne walon ki yahi tauqir karte ho

abas tum KHwahish-e-wasl-e-but-e-be-pir karte ho

jo qismat mein nahin hai us ki kya tadbir karte ho

zamin-o-asman ka farq hai KHurshid-o-zarre mein

muqabil chand se kya yar ki taswir karte ho

dam-e-aKHir laDe wahshi ke zindan mein ye ghul hoga

sitam karte ho viran KHana-e-zanjir karte ho

jo mujh sauda-zada ne ki kabhi tashrih zulfon ki

to bole hans ke kya uljhi hui taqrir karte ho

musafir ke liye hai fikr-e-gor ai munimo lazim

imarat kya sara-e-dahr mein tamir karte ho

sahar tak nind uD jati hai ham-sae ki to be-shak

asar kya KHak aur ai nala-e-shab-gir karte ho

jo mashq-e-harf-e-la karta hun kahte hain daqiqa-ras

muama-e-dahan-e-yar kya tahrir karte ho

abas dil toD kar yaad-e-butan mein mahw ho itna

KHuda ke ghar ko Dha kar but-kada tamir karte ho

hamare baad aaoge to kya ai nama-bar kahna

hum aaKHir hote hain aane mein tum taKHir karte ho

KHat-o-ruKH ki sifat mein raT lagi rahti hai jo tum ko

'qalaq' kya hifz quran ka ma-e-tafsir karte ho