huzur-e-shah mein ahl-e-suKHan ki aazmaish hai

huzūr-e-shāh meñ ahl-e-suḳhan kī āzmā.ish hai

chaman meñ ḳhush-navāyan-e-chaman kī āzmā.ish hai

qad o gesū meñ qais o kohkan kī āzmā.ish hai

jahāñ ham haiñ vahāñ dār-o-rasan kī āzmā.ish hai

kareñge kohkan ke hausle kā imtihān āḳhir

abhī us ḳhasta ke nirū-e-tan kī āzmā.ish hai

nasīm-e-misr ko kyā pīr-e-kan.āñ kī havā-ḳhvāhī

use yūsuf kī bū-e-pairahan kī āzmā.ish hai

vo aayā bazm meñ dekho na kahiyo phir ki ġhāfil the

shakeb-o-sabr-e-ahl-e-anjuman kī āzmā.ish hai

rahe dil hī meñ tiir achchhā jigar ke paar ho behtar

ġharaz shust-e-but-e-nāvak-fagan kī āzmā.ish hai

nahīñ kuchh sub.ha-o-zunnār ke phande meñ gīrā.ī

vafādārī meñ shaiḳh o barhaman kī āzmā.ish hai

paḌā rah ai dil-e-vābasta betābī se kyā hāsil

magar phir tāb-e-zulf-e-pur-shikan kī āzmā.ish hai

rag-o-pai meñ jab utre zahr-e-ġham tab dekhiye kyā ho

abhī to talḳhī-e-kām-o-dahan kī āzmā.ish hai

vo āveñge mire ghar va.ada kaisā dekhnā 'ġhālib'

na.e fitnoñ meñ ab charḳh-e-kuhan kī āzmā.ish hai

huzur-e-shah mein ahl-e-suKHan ki aazmaish hai

chaman mein KHush-nawayan-e-chaman ki aazmaish hai

qad o gesu mein qais o kohkan ki aazmaish hai

jahan hum hain wahan dar-o-rasan ki aazmaish hai

karenge kohkan ke hausle ka imtihan aaKHir

abhi us KHasta ke niru-e-tan ki aazmaish hai

nasim-e-misr ko kya pir-e-kanan ki hawa-KHwahi

use yusuf ki bu-e-pairahan ki aazmaish hai

wo aaya bazm mein dekho na kahiyo phir ki ghafil the

shakeb-o-sabr-e-ahl-e-anjuman ki aazmaish hai

rahe dil hi mein tir achchha jigar ke par ho behtar

gharaz shust-e-but-e-nawak-fagan ki aazmaish hai

nahin kuchh subha-o-zunnar ke phande mein girai

wafadari mein shaiKH o barhaman ki aazmaish hai

paDa rah ai dil-e-wabasta betabi se kya hasil

magar phir tab-e-zulf-e-pur-shikan ki aazmaish hai

rag-o-pai mein jab utre zahr-e-gham tab dekhiye kya ho

abhi to talKHi-e-kaam-o-dahan ki aazmaish hai

wo aawenge mere ghar wada kaisa dekhna 'ghaalib'

nae fitnon mein ab charKH-e-kuhan ki aazmaish hai