huzur-e-yar bhi aazurdagi nahin jati

huzūr-e-yār bhī āzurdagī nahīñ jaatī

ki ham se itnī bhī duurī sahī nahīñ jaatī

ḳhud apne sar ye balā kaun mol letā hai

mohabbat aap se hotī hai kī nahīñ jaatī

lahū jalātī hai ḳhāmoshiyoñ meñ paltī hai

hikāyat-e-dil-e-sozāñ kahī nahīñ jaatī

ham is ko kyā kareñ tum ko hai nā-pasand magar

zabān-e-hāl se barjastagī nahīñ jaatī

milā de ḳhaak meñ ham ko hazār gardish-e-charḳh

magar bagūloñ se āvārgī nahīñ jaatī

chaman vo ho ki bayābāñ bahār ho ki ḳhizāñ

junūñ kī fitrat-e-jāma-varī nahīñ jaatī

agar ġhubār ho dil meñ agar ho tañg-nazar

to mehr o maah se bhī tīrgī nahīñ jaatī

mahaktī rahtī hai ġhurbat meñ bhī sharāfat-e-nafs

gul-e-fasurda se ḳhushbū kabhī nahīñ jaatī

charāġh din meñ dhuāñ hī dhuāñ sā lagtā hai

sharāb raat kī shai din ko pī nahīñ jaatī

agar yaqīn nahīñ hai najābat-e-mai par

to laakh piite raho tishnagī nahīñ jaatī

shu'ūr-e-husn muzmir hijāb meñ 'vāmiq'

barahna chehroñ se be-chehragī nahīñ jaatī

huzur-e-yar bhi aazurdagi nahin jati

ki hum se itni bhi duri sahi nahin jati

KHud apne sar ye bala kaun mol leta hai

mohabbat aap se hoti hai ki nahin jati

lahu jalati hai KHamoshiyon mein palti hai

hikayat-e-dil-e-sozan kahi nahin jati

hum is ko kya karen tum ko hai na-pasand magar

zaban-e-haal se barjastagi nahin jati

mila de KHak mein hum ko hazar gardish-e-charKH

magar bagulon se aawargi nahin jati

chaman wo ho ki bayaban bahaar ho ki KHizan

junun ki fitrat-e-jama-wari nahin jati

agar ghubar ho dil mein agar ho tang-nazar

to mehr o mah se bhi tirgi nahin jati

mahakti rahti hai ghurbat mein bhi sharafat-e-nafs

gul-e-fasurda se KHushbu kabhi nahin jati

charagh din mein dhuan hi dhuan sa lagta hai

sharab raat ki shai din ko pi nahin jati

agar yaqin nahin hai najabat-e-mai par

to lakh pite raho tishnagi nahin jati

shu'ur-e-husn muzmir hijab mein 'wamiq'

barahna chehron se be-chehragi nahin jati