iblis bhi rakh lete hain jab nam farishte

iblīs bhī rakh lete haiñ jab naam farishte

maiñ kyuuñ na kahūñ mujh se bhī haiñ ḳhaam farishte

vo nuur haiñ maiñ ḳhaak huuñ lekin mire bā'is

lete nahīñ ik lamha bhī ārām farishte

tanhā.ī meñ aa jaatī haiñ hūreñ mire ghar meñ

chamkāte haiñ masjid ke dar-o-bām farishte

ik maiñ hī to huuñ rāt-ga.e jāgne vaalā

so jaate haiñ behosh sar-e-shām farishte

jannat se nikālā huā insān vahī hai

shaitān bane baiThe haiñ nākām farishte

huuñ itnā gunahgār ki allāh ke aage

lete hue Darte haiñ mirā naam farishte

duniyā huī ābād to mere hī sabab se

anjām na de paa.e koī kaam farishte

kyā soch ke insān se sharmā.e hue haiñ

dete nahīñ dīdār sar-e-'ām farishte

maiñ ek gunahgār nasīhat kā hadaf huuñ

duniyā meñ bhī milte haiñ bahar-gām farishte

ye duḳhtar-e-raz dāna-e-gandum to nahīñ hai

chakkheñ to sahī bāda-e-gulfām farishte

yuuñ ġhaib se maiñ DhūñD ke laayā huuñ mazāmīñ

jaise koī le aa.e tah-e-dām farishte

jo baat mire dil meñ thī aa.ī hai zabāñ par

ab karte phireñge mujhe badnām farishte

'shahzād' zamāna huā lekin mirī jānib

laate nahīñ allāh kā paiġhām farishte

iblis bhi rakh lete hain jab nam farishte

main kyun na kahun mujh se bhi hain KHam farishte

wo nur hain main KHak hun lekin mere ba'is

lete nahin ek lamha bhi aaram farishte

tanhai mein aa jati hain huren mere ghar mein

chamkate hain masjid ke dar-o-baam farishte

ek main hi to hun raat-gae jagne wala

so jate hain behosh sar-e-sham farishte

jannat se nikala hua insan wahi hai

shaitan bane baiThe hain nakaam farishte

hun itna gunahgar ki allah ke aage

lete hue Darte hain mera nam farishte

duniya hui aabaad to mere hi sabab se

anjam na de pae koi kaam farishte

kya soch ke insan se sharmae hue hain

dete nahin didar sar-e-'am farishte

main ek gunahgar nasihat ka hadaf hun

duniya mein bhi milte hain bahar-gam farishte

ye duKHtar-e-raz dana-e-gandum to nahin hai

chakkhen to sahi baada-e-gulfam farishte

yun ghaib se main DhunD ke laya hun mazamin

jaise koi le aae tah-e-dam farishte

jo baat mere dil mein thi aai hai zaban par

ab karte phirenge mujhe badnam farishte

'shahzad' zamana hua lekin meri jaanib

late nahin allah ka paigham farishte