ibtida sa kuchh intiha sa kuchh

ibtidā sā kuchh intihā sā kuchh

chal tamāshā kareñ zarā sā kuchh

sāmne se ye kā.enāt haTāo

ho rahā hai muġhālta sā kuchh

sar-ba-sar huuñ salāmtī ke sar

maiñ huuñ raftār-o-hādisa sā kuchh

ek ḳhatra hai aane jaane meñ

is sarā meñ hai dūsrā sā kuchh

chaak udhaḌtā hai ḳhaak ukhaḌtī hai

koī hotā hai rūnumā sā kuchh

aur to kuchh nahīñ hai miTne ko

maiñ hī maiñ huuñ banā banā sā kuchh

ye sarakte hue zamīn pe log

ye gunah sā kuchh aur gilā sā kuchh

vaqt par aag vaqt par paanī

zindagī bhar kā tajraba sā kuchh

jo na terā hai aur na merā hai

phir vo kyā hai tirā mirā sā kuchh

jab ḳhudā sā koī nahīñ to kyuuñ

mas.ala ban gayā ḳhudā sā kuchh

ibtida sa kuchh intiha sa kuchh

chal tamasha karen zara sa kuchh

samne se ye kaenat haTao

ho raha hai mughaalta sa kuchh

sar-ba-sar hun salamti ke sar

main hun raftar-o-hadisa sa kuchh

ek KHatra hai aane jaane mein

is sara mein hai dusra sa kuchh

chaak udhaDta hai KHak ukhaDti hai

koi hota hai runuma sa kuchh

aur to kuchh nahin hai miTne ko

main hi main hun bana bana sa kuchh

ye sarakte hue zamin pe log

ye gunah sa kuchh aur gila sa kuchh

waqt par aag waqt par pani

zindagi bhar ka tajraba sa kuchh

jo na tera hai aur na mera hai

phir wo kya hai tera mera sa kuchh

jab KHuda sa koi nahin to kyun

masala ban gaya KHuda sa kuchh