iflas mein bhi rang badan ka nahin utra

iflās meñ bhī rang badan kā nahīñ utrā

faaqe bhī kiye ham ne to chehra nahīñ utrā

ik jhoñk hī meñ chhū liyā qadmoñ ne zamīñ ko

aflāk se vo zīna-ba-zīna nahīñ utrā

paivast-e-zamīñ ho ga.iiñ sab azmateñ lekin

jismoñ se takabbur kā labāda nahīñ utrā

maiñ bhī na kharā utrā tirī maslahatoñ par

tū bhī mire me.aar pe puurā nahīñ utrā

uryāniyāñ pahne hue haiñ beTiyāñ us kī

sar se kabhī jis maañ ke dupaTTa nahīñ utrā

tā-umr maiñ kartā rahā alfāz kā pīchhā

tā-umr mire sar se ye saudā nahīñ utrā

kyā haal ke qisse likhe jaa.eñ ki abhī tak

maazī kī hikāyāt kā nashsha nahīñ utrā

daana to bahut Daalā mirī aql ne 'jauhar'

āñgan meñ kabhī koī parinda nahīñ utrā

iflas mein bhi rang badan ka nahin utra

faqe bhi kiye hum ne to chehra nahin utra

ek jhonk hi mein chhu liya qadmon ne zamin ko

aflak se wo zina-ba-zina nahin utra

paiwast-e-zamin ho gain sab azmaten lekin

jismon se takabbur ka labaada nahin utra

main bhi na khara utra teri maslahaton par

tu bhi mere mear pe pura nahin utra

uryaniyan pahne hue hain beTiyan us ki

sar se kabhi jis man ke dupaTTa nahin utra

ta-umr main karta raha alfaz ka pichha

ta-umr mere sar se ye sauda nahin utra

kya haal ke qisse likhe jaen ki abhi tak

mazi ki hikayat ka nashsha nahin utra

dana to bahut Dala meri aql ne 'jauhar'

aangan mein kabhi koi parinda nahin utra