ik ashk bahā hogā
ik sher huā hogā
chup-chāp paḌe haiñ ham
dil raakh huā hogā
ik ḳhvāb sahārā thā
vo TuuT gayā hogā
dil ne to un āñkhoñ par
ilzām dharā hogā
hai ishq to hai ham-kesh
dil meñ koī thā hogā
kyā nuur thā paanī meñ
āñkhoñ se bahā hogā
phir yaar nahīñ aa.e
phir jaam dharā hogā
ik sho.ala fuzūñ ho kar
jaltā bhī rahā hogā
shab ḳhvāb meñ aayā vo
kyā kyā na huā hogā
tāsīr kahāñ sach meñ
kuchh jhuuT kahā hogā
is dil ke ḳharābe meñ
ik shahr basā hogā
muTThī meñ hai dil kaise
raste meñ milā hogā
kahne kī nahīñ bāteñ
bātoñ se bhī kyā hogā
ik ḳhvāb-e-tamannā ne
barbād kiyā hogā
vo soḳhtā-sar thā kaun
hogā to 'atā' hogā
ek ashk baha hoga
ek sher hua hoga
chup-chap paDe hain hum
dil rakh hua hoga
ek KHwab sahaara tha
wo TuT gaya hoga
dil ne to un aankhon par
ilzam dhara hoga
hai ishq to hai ham-kesh
dil mein koi tha hoga
kya nur tha pani mein
aankhon se baha hoga
phir yar nahin aae
phir jam dhara hoga
ek shoala fuzun ho kar
jalta bhi raha hoga
shab KHwab mein aaya wo
kya kya na hua hoga
tasir kahan sach mein
kuchh jhuT kaha hoga
is dil ke KHarabe mein
ek shahr basa hoga
muTThi mein hai dil kaise
raste mein mila hoga
kahne ki nahin baaten
baaton se bhi kya hoga
ek KHwab-e-tamanna ne
barbaad kiya hoga
wo soKHta-sar tha kaun
hoga to 'ata' hoga
- Book : Aankh Bhar Tamasha Hai (Pg. 101)
- Author : Ahmad Ata
- Publication : Sanjh Publications (2015)
- Edition : 2015
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
