ek bar phir kaho usi naz-o-ada ke sath

ik baar phir kaho usī nāz-o-adā ke saath

tū ne tamām umr guzārī vafā ke saath

saaqī sharāb-e-nāb maza de rahī hai aur

is ittifāq-e-vaqt is abr-o-havā ke saath

ye kyā batā.eñ ham ki sharīk-e-safar thā kaun

manzil pe aa ga.e haiñ kisī rahnumā ke saath

jaur-o-jafā meñ buḳhl nigāh-e-karam meñ uzr

ye kyā sulūk hai dil-e-dard-āshnā ke saath

us sang-dil ko rahm na aa.e to kyā karūñ

sar rakh diyā hai paaoñ pe kis iltijā ke saath

is iltifāt-e-ḳhās pe qurbān jān-o-dil

vo mujh se pesh aa.e haiñ kis e'tinā ke saath

ham ne ye dil se ahd kiyā hai ki tā-hayāt

'nudrat' vafā kareñge ham us bevafā ke saath

ek bar phir kaho usi naz-o-ada ke sath

tu ne tamam umr guzari wafa ke sath

saqi sharab-e-nab maza de rahi hai aur

is ittifaq-e-waqt is abr-o-hawa ke sath

ye kya bataen hum ki sharik-e-safar tha kaun

manzil pe aa gae hain kisi rahnuma ke sath

jaur-o-jafa mein buKHl nigah-e-karam mein uzr

ye kya suluk hai dil-e-dard-ashna ke sath

us sang-dil ko rahm na aae to kya karun

sar rakh diya hai paon pe kis iltija ke sath

is iltifat-e-KHas pe qurban jaan-o-dil

wo mujh se pesh aae hain kis e'tina ke sath

hum ne ye dil se ahd kiya hai ki ta-hayat

'nudrat' wafa karenge hum us bewafa ke sath