ek charaghan raat bhar pani pe hai

ik charāġhāñ raat bhar paanī pe hai

raushnī kā ik nagar paanī pe hai

aks Dhaltī shab ke rang-o-nūr kā

jāzib-e-qalb-o-nazar paanī pe hai

chheḌtī hai rāgnī patvār kyā

ek naġhma sar-basar paanī pe hai

chāñd kī aTkheliyāñ lahroñ ke saath

khel jaarī raat bhar paanī pe hai

kashtiyāñ un kī tsunami le ga.ī

jin ġharīboñ kā basar paanī pe hai

ek muTThī ḳhaak anjām-e-hayāt

asthiyoñ kā phir safar paanī pe hai

kyā ḳhabar kab Duub jaa.e zindagī

ham habāboñ kā safar paanī pe hai

kyā ḳhabar kab mauj-e-tūfāñ de uchhāl

'nāzlī' terā bhī ghar paanī pe hai

ek charaghan raat bhar pani pe hai

raushni ka ek nagar pani pe hai

aks Dhalti shab ke rang-o-nur ka

jazib-e-qalb-o-nazar pani pe hai

chheDti hai ragni patwar kya

ek naghma sar-basar pani pe hai

chand ki aTkheliyan lahron ke sath

khel jari raat bhar pani pe hai

kashtiyan un ki tsunami le gai

jin gharibon ka basar pani pe hai

ek muTThi KHak anjam-e-hayat

asthiyon ka phir safar pani pe hai

kya KHabar kab Dub jae zindagi

hum hababon ka safar pani pe hai

kya KHabar kab mauj-e-tufan de uchhaal

'nazli' tera bhi ghar pani pe hai