ek dafa uljhe to uljhe hi rahe

ik daf'a uljhe to uljhe hī rahe

pyaar ke saude meñ ghāTe hī rahe

dekh kar vo bas tamāshā.ī rahā

aur ham daldal meñ dhañste hī rahe

vo haqīqat kī taraf baḌhtā rahā

us ke sapne sirf sapne hī rahe

vaqt dariyā kī tarah bahtā rahā

be-'amal bas haath malte hī rahe

jaise jaise raushnī baḌhtī ga.ī

sab ke chehre phīke paḌte hī rahe

shāḳh se TuuTe the jo patte kabhī

abr bhī barsā to sūkhe hī rahe

rahmatoñ kī bārisheñ hotī rahīñ

aur zamīñ vaale ki pyāse hī rahe

'ishq ne barzaḳh meñ rakkhā yuuñ ki ham

un ke ho paa.e na ḳhud ke hī rahe

vaqt kā sūraj jagātā hī rahā

vo magar āñkhoñ ko mūñde hī rahe

rahbarī par naaz thā jin ko kabhī

dil kī rāhoñ meñ vo bhaTke hī rahe

chehra paḌhnā mujh ko aatā thā magar

chehre ke pīchhe bhī chehre hī rahe

ek daf'a uljhe to uljhe hi rahe

pyar ke saude mein ghaTe hi rahe

dekh kar wo bas tamashai raha

aur hum daldal mein dhanste hi rahe

wo haqiqat ki taraf baDhta raha

us ke sapne sirf sapne hi rahe

waqt dariya ki tarah bahta raha

be-'amal bas hath malte hi rahe

jaise jaise raushni baDhti gai

sab ke chehre phike paDte hi rahe

shaKH se TuTe the jo patte kabhi

abr bhi barsa to sukhe hi rahe

rahmaton ki barishen hoti rahin

aur zamin wale ki pyase hi rahe

'ishq ne barzaKH mein rakkha yun ki hum

un ke ho pae na KHud ke hi rahe

waqt ka suraj jagata hi raha

wo magar aankhon ko munde hi rahe

rahbari par naz tha jin ko kabhi

dil ki rahon mein wo bhaTke hi rahe

chehra paDhna mujh ko aata tha magar

chehre ke pichhe bhi chehre hi rahe