ek dam-e-guzran se umr-e-muKHtasar bandhe hue

ik dam-e-guzrāñ se 'umr-e-muḳhtasar bāñdhe hue

ḳhaak se haiñ shāḳh-e-gul ko be-ḳhabar bāñdhe hue

ik ḳhumār-e-'aks meñ larzāñ hai āb-e-ā.ina

sehr-e-hairānī hai koī fitna-gar bāñdhe hue

duur tak āñkhoñ meñ koī rāsta khultā nahīñ

aur ham sadiyoñ se haiñ raḳht-e-safar bāñdhe hue

oḌhnī siine ke aadhe moḌ par Dhalkī huī

baal māthe par zarā se chhoḌ kar bāñdhe hue

hai koī harf-e-'adam mā'nī-garī ke darmiyāñ

halqa-e-ib.hām hai 'aib-o-hunar bāñdhe hue

paañv meñ khiñchtī chalī jaatī hai zanjīr-e-safar

raqs meñ ham bhī haiñ naqsh-e-rahguzar bāñdhe hue

ik samundar jo uchhaltā hai kināroñ se pare

vo zarā sī buuñd meñ hai chashm-e-tar bāñdhe hue

daaġh hai siine pe ik tā'vīz kaale 'ishq kā

kyoñ na phir rakkheñ ise ham 'umr bhar bāñdhe hue

phir rahe haiñ kūcha-o-bāzār meñ ham bhī kahīñ

chādar-e-darvesh meñ jān-o-jigar bāñdhe hue

hai havā-e-ḳhush-bayāñ kaifiyyat-e-abr-e-bahār

aur haiñ aurāq-e-gul mazmūn-e-zar bāñdhe hue

jāniye is baar kaisī rut chalī hai shahr meñ

haiñ parinde ghoñsloñ meñ bāl-o-par bāñdhe hue

shahr meñ niklūñ to mujh ko gherte haiñ rāste

ghar meñ rakhte haiñ mujhe dīvār-o-dar bāñdhe hue

kaun suntā hai kahānī raat bhar 'sarmad' magar

hai tirā vird-e-suḳhan ham par asar bāñdhe hue

ek dam-e-guzran se 'umr-e-muKHtasar bandhe hue

KHak se hain shaKH-e-gul ko be-KHabar bandhe hue

ek KHumar-e-'aks mein larzan hai aab-e-aina

sehr-e-hairani hai koi fitna-gar bandhe hue

dur tak aankhon mein koi rasta khulta nahin

aur hum sadiyon se hain raKHt-e-safar bandhe hue

oDhni sine ke aadhe moD par Dhalki hui

baal mathe par zara se chhoD kar bandhe hue

hai koi harf-e-'adam ma'ni-gari ke darmiyan

halqa-e-ibham hai 'aib-o-hunar bandhe hue

panw mein khinchti chali jati hai zanjir-e-safar

raqs mein hum bhi hain naqsh-e-rahguzar bandhe hue

ek samundar jo uchhalta hai kinaron se pare

wo zara si bund mein hai chashm-e-tar bandhe hue

dagh hai sine pe ek ta'wiz kale 'ishq ka

kyon na phir rakkhen ise hum 'umr bhar bandhe hue

phir rahe hain kucha-o-bazar mein hum bhi kahin

chadar-e-darwesh mein jaan-o-jigar bandhe hue

hai hawa-e-KHush-bayan kaifiyyat-e-abr-e-bahaar

aur hain auraq-e-gul mazmun-e-zar bandhe hue

jaaniye is bar kaisi rut chali hai shahr mein

hain parinde ghonslon mein baal-o-par bandhe hue

shahr mein niklun to mujh ko gherte hain raste

ghar mein rakhte hain mujhe diwar-o-dar bandhe hue

kaun sunta hai kahani raat bhar 'sarmad' magar

hai tera wird-e-suKHan hum par asar bandhe hue