ek jafa-ju se mohabbat ho gai

ik jafā-jū se mohabbat ho ga.ī

haa.e ye kaisī himāqat ho ga.ī

ho gayā jis par masīhā mehrbāñ

band us ke dil kī harkat ho ga.ī

aa ga.ī un kī javānī aa ga.ī

ho ga.ī barpā qayāmat ho ga.ī

ye tasavvur kī karishma-sāziyāñ

dekhā jis shai ko vo aurat ho ga.ī

liije vo uTThī nigāh-e-iltifāt

liije takmīl-e-himāqat ho ga.ī

jab nigāh-e-nāz kamsin kī uThī

nannhī-munnī ik qayāmat ho ga.ī

jab hue vo mā.il-e-ahd-e-vafā

baḌh ke maan.e un kī luknat ho ga.ī

kyā kare bechārī duzdīda nigāh

chorī karnā us kī fitrat ho ga.ī

ye ināyāt-e-musalsal al-amāñ

dugunī aur tigunī musībat ho ga.ī

muñh lagī ummāl-e-ahd-e-nau ke bhī

kisī qadar gustāḳh rishvat ho ga.ī

maiñ ne yuuñ dil ko banāyā ā.īna

ā.īna-gar ko bhī hairat ho ga.ī

laakh zālim ne chhupā.e apne aib

'shauq' us kī phir bhī shohrat ho ga.ī

ek jafa-ju se mohabbat ho gai

hae ye kaisi himaqat ho gai

ho gaya jis par masiha mehrban

band us ke dil ki harkat ho gai

aa gai un ki jawani aa gai

ho gai barpa qayamat ho gai

ye tasawwur ki karishma-saziyan

dekha jis shai ko wo aurat ho gai

lije wo uTThi nigah-e-iltifat

lije takmil-e-himaqat ho gai

jab nigah-e-naz kamsin ki uThi

nannhi-munni ek qayamat ho gai

jab hue wo mail-e-ahd-e-wafa

baDh ke mane un ki luknat ho gai

kya kare bechaari duzdida nigah

chori karna us ki fitrat ho gai

ye inayat-e-musalsal al-aman

duguni aur tiguni musibat ho gai

munh lagi ummal-e-ahd-e-nau ke bhi

kisi qadar gustaKH rishwat ho gai

main ne yun dil ko banaya aaina

aaina-gar ko bhi hairat ho gai

lakh zalim ne chhupae apne aib

'shauq' us ki phir bhi shohrat ho gai