اک جہاں زاد چلتا بنا چھوڑ کر اے حسن کوزہ گر

اک جہاں زاد چلتا بنا چھوڑ کر اے حسن کوزہ گر

ہم کھڑے رہ گئے مثل دیوار و در اے حسن کوزہ گر

ہم کو عطار یوسف نے بلوایا تھا خوب سمجھایا تھا

دل پہ لیکن رہی گفتگو بے اثر اے حسن کوزہ گر

تیری کوزہ گری بھی ہوئی رائیگاں عشق بھی بے اماں

اپنا کار جنوں بھی لگا داؤ پر اے حسن کوزہ گر

لمحہ لمحہ پکارا مگر چپ رہی سوختہ بخت بھی

آب و گل کی طرح خاک تھی خاک پر اے حسن کوزہ گر

اے حسن کوزہ گر دیکھ تو اک نظر ہم ہوئے معتبر

کوئی بھی ساتھ اپنا نہیں ہے مگر اے حسن کوزہ گر

تیرا شہباز نیرؔ جو ہم زاد تھا کیسا آزاد تھا

وقت نے اس کو بھی رکھ دیا چاک پر اے حسن کوزہ گر