ek KHwab ke mauhum nishan DhunD raha tha

ik ḳhvāb ke mauhūm nishāñ DhūñD rahā thā

maiñ hadd-e-yaqīñ par bhī gumāñ DhūñD rahā thā

saa.e kī tarah bhāgte māhaul ke andar

maiñ apne ḳhayāloñ kā jahāñ DhūñD rahā thā

jo raaz hai vo khul ke bhī ik raaz hī rah jaa.e

iz.hār ko maiñ aisī zabāñ DhūñD rahā thā

marham kī tamannā thī mujhe zaḳhm se bāhar

darmāñ thā kahāñ aur kahāñ DhūñD rahā thā

shāyad ki vo vāqif nahīñ ādāb-e-safar se

paanī meñ jo qadmoñ ke nishāñ DhūñD rahā thā

kab thā use andāza 'sahar' sañg-e-falak kā

shīshe ke makāñ meñ jo amaañ DhūñD rahā thā

ek KHwab ke mauhum nishan DhunD raha tha

main hadd-e-yaqin par bhi guman DhunD raha tha

sae ki tarah bhagte mahaul ke andar

main apne KHayalon ka jahan DhunD raha tha

jo raaz hai wo khul ke bhi ek raaz hi rah jae

izhaar ko main aisi zaban DhunD raha tha

marham ki tamanna thi mujhe zaKHm se bahar

darman tha kahan aur kahan DhunD raha tha

shayad ki wo waqif nahin aadab-e-safar se

pani mein jo qadmon ke nishan DhunD raha tha

kab tha use andaza 'sahar' sang-e-falak ka

shishe ke makan mein jo aman DhunD raha tha