ek nazar mein dard kho dena dil-e-bimar ka

ik nazar meñ dard kho denā dil-e-bīmār kā

ye to adnā sā karishma hai nigāh-e-yār kā

ġhair mumkin hai ki ho pāmāl koī hashr meñ

ho na jab tak kuchh ishāra aap kī raftār kā

hazrat-e-ādam se tā iiñ dam hue sab ishq dost

hai azal se daur daura husn kī sarkār kā

ham jo mar kar jī uThe is par ta.ajjub kyā ki hai

vo karāmat chaal kī ye mojaza guftār kā

aap ke ġhamze uThā.ūñ ġhair ke taane sunūñ

banda parvar maiñ ne chhoḌā ishq bhī sarkār kā

ābloñ ko sar uThāne kī zarā mohlat nahīñ

hai karam sahrā-navardī meñ ye nok-e-ḳhār kā

is se baḌh kar aap 'ahsan' chāhte haiñ aur kyā

dostoñ kī daad hai goyā sila ash.ār kā

ek nazar mein dard kho dena dil-e-bimar ka

ye to adna sa karishma hai nigah-e-yar ka

ghair mumkin hai ki ho pamal koi hashr mein

ho na jab tak kuchh ishaara aap ki raftar ka

hazrat-e-adam se ta in dam hue sab ishq dost

hai azal se daur daura husn ki sarkar ka

hum jo mar kar ji uThe is par tajjub kya ki hai

wo karamat chaal ki ye mojaza guftar ka

aap ke ghamze uThaun ghair ke tane sunun

banda parwar main ne chhoDa ishq bhi sarkar ka

aablon ko sar uThane ki zara mohlat nahin

hai karam sahra-nawardi mein ye nok-e-KHar ka

is se baDh kar aap 'ahsan' chahte hain aur kya

doston ki dad hai goya sila ashaar ka