ek raat mein sau bar jala aur bujha hun

ik raat meñ sau baar jalā aur bujhā huuñ

muflis kā diyā huuñ magar āñdhī se laḌā huuñ

jo kahnā ho kahiye ki abhī jaag rahā huuñ

so.ūñgā to so jā.ūñgā din bhar kā thakā huuñ

qindīl samajh kar koī sar kaaT na le aa.e

tājir huuñ ujāle kā añdhere meñ khaḌā huuñ

sab ek nazar pheñk ke baḌh jaate haiñ aage

maiñ vaqt ke show-case meñ chup-chāp khaḌā huuñ

vo aa.ina huuñ jo kabhī kamre meñ sajā thā

ab gir ke jo TuuTā huuñ to raste meñ paḌā huuñ

duniyā kā koī hādsa ḳhālī nahīñ mujh se

maiñ ḳhaak huuñ maiñ aag huuñ paanī huuñ havā huuñ

mil jā.ūñgā dariyā meñ to ho jā.ūñgā dariyā

sirf is liye qatra huuñ ki dariyā se judā huuñ

har daur ne baḳhshī mujhe me.arāj-e-mohabbat

neze pe chaḌhā huuñ kabhī suulī pe chaḌhā huuñ

duniyā se nirālī hai 'nazīr' apnī kahānī

añgāroñ se bach niklā huuñ phūloñ se jalā huuñ

ek raat mein sau bar jala aur bujha hun

muflis ka diya hun magar aandhi se laDa hun

jo kahna ho kahiye ki abhi jag raha hun

sounga to so jaunga din bhar ka thaka hun

qindil samajh kar koi sar kaT na le aae

tajir hun ujale ka andhere mein khaDa hun

sab ek nazar phenk ke baDh jate hain aage

main waqt ke show-case mein chup-chap khaDa hun

wo aaina hun jo kabhi kamre mein saja tha

ab gir ke jo TuTa hun to raste mein paDa hun

duniya ka koi hadsa KHali nahin mujh se

main KHak hun main aag hun pani hun hawa hun

mil jaunga dariya mein to ho jaunga dariya

sirf is liye qatra hun ki dariya se juda hun

har daur ne baKHshi mujhe mearaj-e-mohabbat

neze pe chaDha hun kabhi suli pe chaDha hun

duniya se nirali hai 'nazir' apni kahani

angaron se bach nikla hun phulon se jala hun