ek roz hue the kuchh ishaaraat KHafi se

ik roz hue the kuchh ishārāt ḳhafī se

āshiq haiñ ham us nargis-e-rānā ke jabhī se

karne ko haiñ duur aaj to tau ye rog hī jī se

ab rakkheñge ham pyaar na tum se na kisī se

ahbāb se rakhtā huuñ kuchh ummīd-e-sharāfat

rahte haiñ ḳhafā mujh se bahut log isī se

kahtā huuñ use maiñ to ḳhusūsiyyat-e-pinhāñ

kuchh tum ko shikāyat hai kasī se to mujhī se

ash.ār nahīñ haiñ ye mirī ruuh kī hai pyaas

jaarī hue sar-chashme mirī tishna-labī se

aañsū ko mire khel tamāshā na samajhnā

kaT jaatā hai patthar isī hiire kī kanī se

yād-e-lab-e-jānāñ hai charāġh-e-dil-e-ranjūr

raushan hai ye ghar aaj usī la.al-e-yamanī se

aflāk kī mehrāb hai aa.ī huī añgḌā.ī

be-kaif kuchh āfāq kī a.azā-shikanī se

kuchh zer-e-lab alfāz khanakte haiñ fazā meñ

gūñjī huī hai bazm tirī kam-suḳhanī se

aaj anjuman-e-ishq nahīñ anjuman-e-ishq

kis darja kamī bazm meñ hai terī kamī se

is vādī-e-vīrāñ meñ hai sar-chashma-e-dil bhī

hastī mirī sairāb hai āñkhoñ kī namī se

ḳhud mujh ko bhī tā-der ḳhabar ho nahīñ paa.ī

aaj aa.ī tirī yaad is āhista-ravī se

vo DhūñDhne niklī hai tirī nik.hat-e-gesū

ik roz milā thā maiñ nasīm-e-saharī se

sab kuchh vo dilā de mujhe sab kuchh vo banā de

ai dost nahīñ duur tirī kam-nigahī se

mī.ād-e-davām-o-abad ik niiñd hai us kī

ham muntahī-e-jalva-e-jānāñ haiñ abhī se

ik dil ke sivā paas hamāre nahīñ kuchh bhī

jo kaam ho le lete haiñ ham log isī se

ma.alūm huā aur hai ik ālam-e-asrār

ā.īna-e-hastī kī pareshāñ-nazarī se

is se to kahīñ baiTh rahe toḌ ke ab paaoñ

mil jaa.e najāt ishq ko is dar-ba-darī se

rahtā huuñ 'firāq' is liye vārafta ki duniyā

kuchh hosh meñ aa jaa.e mirī be-ḳhabarī se

ek roz hue the kuchh ishaaraat KHafi se

aashiq hain hum us nargis-e-rana ke jabhi se

karne ko hain dur aaj to tau ye rog hi ji se

ab rakkhenge hum pyar na tum se na kisi se

ahbab se rakhta hun kuchh ummid-e-sharafat

rahte hain KHafa mujh se bahut log isi se

kahta hun use main to KHususiyyat-e-pinhan

kuchh tum ko shikayat hai kasi se to mujhi se

ashaar nahin hain ye meri ruh ki hai pyas

jari hue sar-chashme meri tishna-labi se

aansu ko mere khel tamasha na samajhna

kaT jata hai patthar isi hire ki kani se

yaad-e-lab-e-jaanan hai charagh-e-dil-e-ranjur

raushan hai ye ghar aaj usi lal-e-yamani se

aflak ki mehrab hai aai hui angDai

be-kaif kuchh aafaq ki aaza-shikani se

kuchh zer-e-lab alfaz khanakte hain faza mein

gunji hui hai bazm teri kam-suKHani se

aaj anjuman-e-ishq nahin anjuman-e-ishq

kis darja kami bazm mein hai teri kami se

is wadi-e-viran mein hai sar-chashma-e-dil bhi

hasti meri sairab hai aankhon ki nami se

KHud mujh ko bhi ta-der KHabar ho nahin pai

aaj aai teri yaad is aahista-rawi se

wo DhunDhne nikli hai teri nikhat-e-gesu

ek roz mila tha main nasim-e-sahari se

sab kuchh wo dila de mujhe sab kuchh wo bana de

ai dost nahin dur teri kam-nigahi se

miad-e-dawam-o-abad ek nind hai us ki

hum muntahi-e-jalwa-e-jaanan hain abhi se

ek dil ke siwa pas hamare nahin kuchh bhi

jo kaam ho le lete hain hum log isi se

malum hua aur hai ek aalam-e-asrar

aaina-e-hasti ki pareshan-nazari se

is se to kahin baiTh rahe toD ke ab paon

mil jae najat ishq ko is dar-ba-dari se

rahta hun 'firaq' is liye warafta ki duniya

kuchh hosh mein aa jae meri be-KHabari se