ek roz ye sar-rishta-e-idrak jala dun

ik roz ye sar-rishta-e-idrāk jalā duuñ

ai ishq tirī vahshat-e-saffāk jalā duuñ

ho bas meñ jo mere to tirā naam bhī miT jaa.e

maiñ kar ke tujhe ḳhaak tirī ḳhaak jalā duuñ

siine meñ ulajhtī hai rag-e-dil se rag-e-dil

ai ishq havā de ḳhas-e-namnāk jalā duuñ

tāsīr meñ kam ho to karūñ sher ko bhī aaq

ātish meñ jo kam ho vo rag-e-tāk jalā duuñ

nazzāra koī yuuñ bhī na mahram ho ki 'kāshif'

āñkhoñ ko sar-e-jalva-e-bebāk jalā duuñ

ek roz ye sar-rishta-e-idrak jala dun

ai ishq teri wahshat-e-saffak jala dun

ho bas mein jo mere to tera nam bhi miT jae

main kar ke tujhe KHak teri KHak jala dun

sine mein ulajhti hai rag-e-dil se rag-e-dil

ai ishq hawa de KHas-e-namnak jala dun

tasir mein kam ho to karun sher ko bhi aaq

aatish mein jo kam ho wo rag-e-tak jala dun

nazzara koi yun bhi na mahram ho ki 'kashif'

aankhon ko sar-e-jalwa-e-bebak jala dun