ek sadma dard-e-dil se meri jaan par to hai

ik sadma dard-e-dil se mirī jaan par to hai

lekin balā se yaar ke zaanū pe sar to hai

aanā hai un kā aanā qayāmat kā dekhiye

kab aa.eñ lekin aane kī un ke ḳhabar to hai

hai sar shahīd-e-ishq kā zeb-e-sinān-e-yār

sad shukr baare naḳhl-e-vafā bārvar to hai

mānind-e-sham.a girya hai kyā shuġhl-e-turfa-tar

ho jaatī raat us meñ balā se basar to hai

hai dard dil meñ gar nahīñ hamdard mere paas

dil-soz koī gar nahīñ soz-e-jigar to hai

ai dil hujūm-e-dard-o-alam se na tañg ho

ḳhāna-ḳharāb ḳhush ho ki ābād ghar to hai

turbat pe dil-jaloñ kī nahīñ gar charāġh o gul

siine meñ sozish-e-dil o dāġh-e-jigar to hai

ġhā.eb meñ jo kahā so kahā phir bhī hai ye shukr

ḳhāmosh ho gayā vo mujhe dekh kar to hai

kashti-e-bahr-e-ġham hai mire haq meñ teġh-e-yār

kar detī ek dam meñ idhar se udhar to hai

vo dil ki jis meñ soz-e-mohabbat na hove 'zauq'

behtar hai sañg us se ki us meñ sharar to hai

ek sadma dard-e-dil se meri jaan par to hai

lekin bala se yar ke zanu pe sar to hai

aana hai un ka aana qayamat ka dekhiye

kab aaen lekin aane ki un ke KHabar to hai

hai sar shahid-e-ishq ka zeb-e-sinan-e-yar

sad shukr bare naKHl-e-wafa barwar to hai

manind-e-shama girya hai kya shughl-e-turfa-tar

ho jati raat us mein bala se basar to hai

hai dard dil mein gar nahin hamdard mere pas

dil-soz koi gar nahin soz-e-jigar to hai

ai dil hujum-e-dard-o-alam se na tang ho

KHana-KHarab KHush ho ki aabaad ghar to hai

turbat pe dil-jalon ki nahin gar charagh o gul

sine mein sozish-e-dil o dagh-e-jigar to hai

ghaeb mein jo kaha so kaha phir bhi hai ye shukr

KHamosh ho gaya wo mujhe dekh kar to hai

kashti-e-bahr-e-gham hai mere haq mein tegh-e-yar

kar deti ek dam mein idhar se udhar to hai

wo dil ki jis mein soz-e-mohabbat na howe 'zauq'

behtar hai sang us se ki us mein sharar to hai