ek samundar sa gira tha mujh mein

ik samundar sā girā thā mujh meñ

phir bahut shor huā thā mujh meñ

rāste saare hī mānūs se the

ik faqat maiñ hī nayā thā mujh meñ

maiñ bhī tasvīr sā chaspāñ thā kahīñ

sāneha ye bhī huā thā mujh meñ

ḳhaak aur ḳhuun meñ nahlāyā huā

kab se ik shaḳhs paḌā thā mujh meñ

barf kī tah meñ laraztī huī laash

aisā manzar bhī chhupā thā mujh meñ

maiñ samajhtā thā jise jān-e-nafas

vo bahut duur khaḌā thā mujh meñ

us ne kyoñ chhoḌ diyā ḳhāna-e-dil

naqsh-e-har-lams harā thā mujh meñ

thā koī mujh meñ jo thā mujh se haqīr

aur koī mujh se baḌā thā mujh meñ

raqs karte hue tāroñ kā hujūm

ye ḳhazāna bhī gaḌā thā mujh meñ

āsmāñ ḳhauf se taktā thā mujhe

kyā koī us se baḌā thā mujh meñ

ek samundar sa gira tha mujh mein

phir bahut shor hua tha mujh mein

raste sare hi manus se the

ek faqat main hi naya tha mujh mein

main bhi taswir sa chaspan tha kahin

saneha ye bhi hua tha mujh mein

KHak aur KHun mein nahlaya hua

kab se ek shaKHs paDa tha mujh mein

barf ki tah mein larazti hui lash

aisa manzar bhi chhupa tha mujh mein

main samajhta tha jise jaan-e-nafas

wo bahut dur khaDa tha mujh mein

us ne kyon chhoD diya KHana-e-dil

naqsh-e-har-lams hara tha mujh mein

tha koi mujh mein jo tha mujh se haqir

aur koi mujh se baDa tha mujh mein

raqs karte hue taron ka hujum

ye KHazana bhi gaDa tha mujh mein

aasman KHauf se takta tha mujhe

kya koi us se baDa tha mujh mein