ek shaKHs pa gaya hai andheron mein kya charagh

ik shaḳhs pā gayā hai añdheroñ meñ kyā charāġh

sab us se pūchhte haiñ kahāñ se milā charāġh

maanā ki zulmatoñ se bahut duur thā charāġh

lekin mire ḳhayāl kā raushan rahā charāġh

nākāmiyoñ kā muñh to use dekhnā hī thā

vo bhī to āñdhiy.oñ meñ jalāne chalā charāġh

ye silsila bhī bazm-e-tamannā kā ḳhuub hai

jab ek bujh gayā to jalā dūsrā charāġh

ab raushnī hai maañd purāne charāġh kī

ab laao raushnī ke liye ik nayā charāġh

kyā us ko rāstoñ meñ añdheroñ kā ḳhauf ho

jis kī musāfirat ke liye karbalā charāġh

jis kī ziyā hai 'ālam-e-imkāñ kī raushnī

ġhār-e-hirā meñ aisā jalāyā gayā charāġh

maiñ ne sipar bichā.ī hai chāroñ taraf 'hayāt'

dekhūñgā ab bujhātī hai kaise havā charāġh

ek shaKHs pa gaya hai andheron mein kya charagh

sab us se puchhte hain kahan se mila charagh

mana ki zulmaton se bahut dur tha charagh

lekin mere KHayal ka raushan raha charagh

nakaamiyon ka munh to use dekhna hi tha

wo bhi to aandhiyon mein jalane chala charagh

ye silsila bhi bazm-e-tamanna ka KHub hai

jab ek bujh gaya to jala dusra charagh

ab raushni hai mand purane charagh ki

ab lao raushni ke liye ek naya charagh

kya us ko raston mein andheron ka KHauf ho

jis ki musafirat ke liye karbala charagh

jis ki ziya hai 'alam-e-imkan ki raushni

ghaar-e-hira mein aisa jalaya gaya charagh

main ne sipar bichai hai chaaron taraf 'hayat'

dekhunga ab bujhati hai kaise hawa charagh