ek tair-e-KHizar kahin rasta badal gaya

ik tā.ir-e-ḳhizar kahīñ rasta badal gayā

sahrā-e-fikr terā nasība badal gayā

milne lagī ajiib sī ta.abīr bhiik meñ

lagtā hai ḳhvāb kā koī kaasa badal gayā

iz.hār karte dil kī ḳhamoshī zarā batā

badlā hai ġham ki ġham kā mudāvā badal gayā

maiñ sāhil-e-gumāñ kī zabāñ sīkhtā magar

dariyā-e-mumkināt kā lahja badal gayā

saiqal-garī kamāl kī ik aks-e-gul ne kī

ā.īna-e-chaman kā sarāpā badal gayā

ruḳhsat milī to tohfe meñ ḳhayyāt-e-tishnagī

āsūdgī ke tan kā labāda badal gayā

lagne lagī hai phir se mujhe ajnabī zamīñ

lagtā hai phir se merā sitāra badal gayā

ek tair-e-KHizar kahin rasta badal gaya

sahra-e-fikr tera nasiba badal gaya

milne lagi ajib si tabir bhik mein

lagta hai KHwab ka koi kasa badal gaya

izhaar karte dil ki KHamoshi zara bata

badla hai gham ki gham ka mudawa badal gaya

main sahil-e-guman ki zaban sikhta magar

dariya-e-mumkinat ka lahja badal gaya

saiqal-gari kamal ki ek aks-e-gul ne ki

aaina-e-chaman ka sarapa badal gaya

ruKHsat mili to tohfe mein KHayyat-e-tishnagi

aasudgi ke tan ka labaada badal gaya

lagne lagi hai phir se mujhe ajnabi zamin

lagta hai phir se mera sitara badal gaya