ek tamanna ki sahar se kahin kho jati hai

ik tamannā ki sahar se kahīñ kho jaatī hai

shab ko aa kar mire āġhosh meñ so jaatī hai

ye nigāhoñ ke añdhere nahīñ chhaTne paate

sub.h kā zikr nahīñ sub.h to ho jaatī hai

rishta-e-jāñ ko sambhāle huuñ ki aksar tirī yaad

is meñ do-chār guhar aa ke piro jaatī hai

dil kī taufīq se miltā hai surāġh-e-manzil

aañkh to sirf tamāshoñ hī meñ kho jaatī hai

kab mujhe dāva-e-ismat hai magar yaad us kī

jab bhī aa jaatī hai dāman mirā dho jaatī hai

nāḳhudā chāra-e-tūfāñ kare koī varna

ab koī mauj safīne ko Dubo jaatī hai

kar chukā jashn-e-bahārāñ se maiñ tauba 'haqqī'

fasl-e-gul aa ke mirī jaan ko ro jaatī hai

ek tamanna ki sahar se kahin kho jati hai

shab ko aa kar mere aaghosh mein so jati hai

ye nigahon ke andhere nahin chhaTne pate

subh ka zikr nahin subh to ho jati hai

rishta-e-jaan ko sambhaale hun ki aksar teri yaad

is mein do-chaar guhar aa ke piro jati hai

dil ki taufiq se milta hai suragh-e-manzil

aankh to sirf tamashon hi mein kho jati hai

kab mujhe dawa-e-ismat hai magar yaad us ki

jab bhi aa jati hai daman mera dho jati hai

naKHuda chaara-e-tufan kare koi warna

ab koi mauj safine ko Dubo jati hai

kar chuka jashn-e-bahaaran se main tauba 'haqqi'

fasl-e-gul aa ke meri jaan ko ro jati hai