ek tasawwur be-karan tha aur main

ik tasavvur be-karāñ thā aur maiñ

dard kā sail-e-ravāñ thā aur maiñ

ġham kā ik ātish-fishāñ thā aur maiñ

duur tak gahrā dhuāñ thā aur maiñ

kis se maiñ un kā Thikānā pūchhtā

sāmne ḳhālī makāñ thā aur maiñ

mere chehre se numāyāñ kaun thā

ā.inoñ kā ik jahāñ thā aur maiñ

ik shikasta naav thī ummīd kī

ek bahr-e-be-karāñ thā aur maiñ

justujū thī manzil-e-mauhūm kī

ye zamīñ thī āsmāñ thā aur maiñ

kaun thā jo dhyān se suntā mujhe

qissa-e-āshuftagāñ thā aur maiñ

haath meñ 'ajmal' koī tesha na thā

azm thā koh-e-girāñ thā aur maiñ

ek tasawwur be-karan tha aur main

dard ka sail-e-rawan tha aur main

gham ka ek aatish-fishan tha aur main

dur tak gahra dhuan tha aur main

kis se main un ka Thikana puchhta

samne KHali makan tha aur main

mere chehre se numayan kaun tha

aainon ka ek jahan tha aur main

ek shikasta naw thi ummid ki

ek bahr-e-be-karan tha aur main

justuju thi manzil-e-mauhum ki

ye zamin thi aasman tha aur main

kaun tha jo dhyan se sunta mujhe

qissa-e-ashuftagan tha aur main

hath mein 'ajmal' koi tesha na tha

azm tha koh-e-giran tha aur main