ek tilism-e-ajab-numa hun main

ik tilism-e-ajab-numā huuñ maiñ

kyā batā.ūñ tumheñ ki kyā huuñ maiñ

hai zavāl apnā ik nishān-e-kamāl

bado kī tarah ghaT gayā huuñ maiñ

kyā nishāñ pūchhte ho tum merā

rah-e-gum-gashta kā patā huuñ maiñ

hai ye hairat ki huuñ tajassum-e-dard

aur har dard kī davā huuñ maiñ

merī shohrat hai merī gumnāmī

quvvat-e-bāzū-e-humā huuñ maiñ

rah-e-ulfat meñ naqsh-e-pā kī tarah

ḳhaak ho ho ke miT gayā huuñ maiñ

sāġhar-e-ishq kar gayā be-ḳhud

hosh kis ko nahīñ huuñ yā huuñ maiñ

ḳhaak samjho tum aabrū merī

dard-e-e.azāz kī bahā huuñ maiñ

dam ġhanīmat hai sāliko merā

jaras-e-daur kī sadā huuñ maiñ

huuñ surāhī meñ bāda-e-ahmar

aur mai-e-surḳh meñ nasha huuñ maiñ

jis tarah se kañval ho paanī meñ

ho ke duniyā meñ phir judā huuñ maiñ

ḳhāksārī hai merī jauhar-e-zāt

ḳhaak meñ misl-e-kīmiyā huuñ maiñ

dur durj-e-vafā kī aab huuñ maiñ

dil ke ā.īne kī safā huuñ maiñ

aaj hai merī dhaak aalam meñ

rū-shanās-e-shah-o-gadā huuñ maiñ

dhuum hai fann-e-sher meñ merī

qamar-e-ilm kī ziyā huuñ maiñ

likhūñ gar dāstān-e-ranj-o-alam

dil-e-ba-shikasta kī sadā huuñ maiñ

gar karūñ zikr-e-sāz-e-aish-o-tarab

tūtī-e-ḳhuld kī navā huuñ maiñ

gar maiñ likkhūñ bayān-e-arsa-e-razm

nāvak-e-tarkash qazā huuñ maiñ

ek is nazm par hai kyā mauqūf

nuur sham-e-ulūm kā huuñ maiñ

qadr hai merī qadr-e-ilm-o-hunar

kyā zamāne meñ dūsrā huuñ maiñ

huuñ to sab kuchh pe kuchh nahīñ 'kaifī'

sūrat-e-mauja-e-fanā huuñ maiñ

ek tilism-e-ajab-numa hun main

kya bataun tumhein ki kya hun main

hai zawal apna ek nishan-e-kamal

bado ki tarah ghaT gaya hun main

kya nishan puchhte ho tum mera

rah-e-gum-gashta ka pata hun main

hai ye hairat ki hun tajassum-e-dard

aur har dard ki dawa hun main

meri shohrat hai meri gumnami

quwwat-e-bazu-e-huma hun main

rah-e-ulfat mein naqsh-e-pa ki tarah

KHak ho ho ke miT gaya hun main

saghar-e-ishq kar gaya be-KHud

hosh kis ko nahin hun ya hun main

KHak samjho tum aabru meri

dard-e-eazaz ki baha hun main

dam ghanimat hai saliko mera

jaras-e-daur ki sada hun main

hun surahi mein baada-e-ahmar

aur mai-e-surKH mein nasha hun main

jis tarah se kanwal ho pani mein

ho ke duniya mein phir juda hun main

KHaksari hai meri jauhar-e-zat

KHak mein misl-e-kimiya hun main

dur durj-e-wafa ki aab hun main

dil ke aaine ki safa hun main

aaj hai meri dhak aalam mein

ru-shanas-e-shah-o-gada hun main

dhum hai fann-e-sher mein meri

qamar-e-ilm ki ziya hun main

likhun gar dastan-e-ranj-o-alam

dil-e-ba-shikasta ki sada hun main

gar karun zikr-e-saz-e-aish-o-tarab

tuti-e-KHuld ki nawa hun main

gar main likkhun bayan-e-arsa-e-razm

nawak-e-tarkash qaza hun main

ek is nazm par hai kya mauquf

nur sham-e-ulum ka hun main

qadr hai meri qadr-e-ilm-o-hunar

kya zamane mein dusra hun main

hun to sab kuchh pe kuchh nahin 'kaifi'

surat-e-mauja-e-fana hun main