ek umr fasane gham-e-jaanan ke gaDhe hain

ik umr fasāne ġham-e-jānāñ ke gaḌhe haiñ

taare ufuq-e-sher pe kyā kyā na jaḌe haiñ

sahrā meñ hai jal-thal to samundar meñ bagūle

ham vaz.a ke pāband haiñ chup-chāp paḌe haiñ

aa.e koī jaa.e hameñ kyā kaam ki ham log

khambe haiñ ki saḌkoñ ke kināre pe gaḌe haiñ

ḳhud par jo paḌī hai to dhaḌaktā nahīñ dil bhī

ġhairoñ ke liye ka.abe meñ jā jā ke laḌe haiñ

mehdī koī aa.egā badal degā muqaddar

kyā jāniye is aas meñ kis din se paḌe haiñ

ham kuchh bhī hoñ lekin haiñ tire paañv kī miTTī

charche tire kuchh bhī na hoñ phir bhī to baḌe haiñ

ye martaba hāsil hai tirī bazm ko jin se

vo log abhī tak pas-e-dīvār paḌe haiñ

añgāre baraste haiñ agar kuchh to hai varna

is muñh se sadā phuul mohabbat ke jhaḌe haiñ

mauqūf karo ham-suḳhanī 'mīr' kī 'shohrat'

arbāb-e-qalam par ye shab-o-roz kaḌe haiñ

ek umr fasane gham-e-jaanan ke gaDhe hain

tare ufuq-e-sher pe kya kya na jaDe hain

sahra mein hai jal-thal to samundar mein bagule

hum waza ke paband hain chup-chap paDe hain

aae koi jae hamein kya kaam ki hum log

khambe hain ki saDkon ke kinare pe gaDe hain

KHud par jo paDi hai to dhaDakta nahin dil bhi

ghairon ke liye kabe mein ja ja ke laDe hain

mehdi koi aaega badal dega muqaddar

kya jaaniye is aas mein kis din se paDe hain

hum kuchh bhi hon lekin hain tere panw ki miTTi

charche tere kuchh bhi na hon phir bhi to baDe hain

ye martaba hasil hai teri bazm ko jin se

wo log abhi tak pas-e-diwar paDe hain

angare baraste hain agar kuchh to hai warna

is munh se sada phul mohabbat ke jhaDe hain

mauquf karo ham-suKHani 'mir' ki 'shohrat'

arbab-e-qalam par ye shab-o-roz kaDe hain