ek zaKHm roz chehre pe mere laga diya

ik zaḳhm roz chehre pe mere lagā diyā

maiñ aadmī thā mujh ko tamāshā banā diyā

dushman kī sarzamīñ thī mire sāmne magar

sāhil pe aa ke maiñ ne safīna jalā diyā

ham ne to zarre zarre meñ dekhā hai us kā nuur

muusā ko us ne tuur pe jalva dikhā diyā

duniyā ke hādsāt the chāroñ taraf magar

maañ kī du'ā ne mujh ko bahut hausla diyā

us din se band maiñ ne darīcha nahīñ kiyā

jis din se us ne aane kā muzhda sunā diyā

har shai se dil uchāT mirā ho gayā hai ab

duniyā ne kaisā āñkhoñ ko manzar dikhā diyā

allāh ke karam ko navāzish ko kyā kahūñ

'fārūq' maiñ to sahrā thā dariyā banā diyā

ek zaKHm roz chehre pe mere laga diya

main aadmi tha mujh ko tamasha bana diya

dushman ki sarzamin thi mere samne magar

sahil pe aa ke main ne safina jala diya

hum ne to zarre zarre mein dekha hai us ka nur

musa ko us ne tur pe jalwa dikha diya

duniya ke hadsat the chaaron taraf magar

man ki du'a ne mujh ko bahut hausla diya

us din se band main ne daricha nahin kiya

jis din se us ne aane ka muzhda suna diya

har shai se dil uchaT mera ho gaya hai ab

duniya ne kaisa aankhon ko manzar dikha diya

allah ke karam ko nawazish ko kya kahun

'faruq' main to sahra tha dariya bana diya