ilahi bulbul-e-gulzar-mani kar lisan mera

ilāhī bulbul-e-gulzār-ma.anī kar lisāñ merā

ba-rañg-e-abr-e-naisānī suḳhan gauhar-fishāñ merā

sune par hoveñ ushshāqāñ ye ma.anī ramz suuñ sarmast

le jāveñ faiz ġhavvās-e-haqīqat haq-rasāñ merā

latāfat gulbun-e-husn jahāñ-ārā samajh ai dil

huā hai zulf aur ruḳhsār-e-jānāñ āshiyāñ merā

diyā hai āb-o-tāb-e-chashm daana ḳhāl-e-āriz kā

kaho sab us ko ab qātil hai yārab dilsitāñ merā

huā hai manzar-e-chashm-e-nazar manzūr-e-ushshāqāñ

dar-o-dīvār suuñ distā nishān-e-be-nishāñ merā

'alīmullāh' ḳhamosh ab ramz asrār-e-ilāhī kā

samajhtā hai kahāñ har shaḳhs mastī kā bayāñ merā

ilahi bulbul-e-gulzar-mani kar lisan mera

ba-rang-e-abr-e-naisani suKHan gauhar-fishan mera

sune par howen ushshaqan ye mani ramz sun sarmast

le jawen faiz ghawwas-e-haqiqat haq-rasan mera

latafat gulbun-e-husn jahan-ara samajh ai dil

hua hai zulf aur ruKHsar-e-jaanan aashiyan mera

diya hai aab-o-tab-e-chashm dana KHal-e-ariz ka

kaho sab us ko ab qatil hai yarab dilsitan mera

hua hai manzar-e-chashm-e-nazar manzur-e-ushshaqan

dar-o-diwar sun dista nishan-e-be-nishan mera

'alimullah' KHamosh ab ramz asrar-e-ilahi ka

samajhta hai kahan har shaKHs masti ka bayan mera