ilahi kash gham-e-ishq kaam kar jae

ilāhī kaash ġham-e-ishq kaam kar jaa.e

jo kal guzarnī hai mujh par abhī guzar jaa.e

tamām umr rahe ham to ḳhair kāñToñ meñ

ḳhudā kare tirā dāman guloñ se bhar jaa.e

zamāna ahl-e-ḳhirad se to ho chukā māyūs

ajab nahīñ koī dīvāna kaam kar jaa.e

hamārā hashr to jo kuchh huā huā lekin

duā ye hai ki tirī āqibat sañvar jaa.e

nigāh-e-shauq vahī hai nigāh-e-shauq 'shamīm'

jo ek baar ruḳh-e-yār par Thahar jaa.e

ilahi kash gham-e-ishq kaam kar jae

jo kal guzarni hai mujh par abhi guzar jae

tamam umr rahe hum to KHair kanTon mein

KHuda kare tera daman gulon se bhar jae

zamana ahl-e-KHirad se to ho chuka mayus

ajab nahin koi diwana kaam kar jae

hamara hashr to jo kuchh hua hua lekin

dua ye hai ki teri aaqibat sanwar jae

nigah-e-shauq wahi hai nigah-e-shauq 'shamim'

jo ek bar ruKH-e-yar par Thahar jae