shuur-e-kaif-o-KHushi hai zara Thahr jao

shu.ūr-e-kaif-o-ḳhushī hai zarā Thahr jaao

vufūr-e-ġham meñ kamī hai zarā Thahar jaao

natīja johd-e-musalsal kā aage kyā hogā

mahall-e-fikr yahī hai zarā Thahar jaao

kashākash-e-ġham-e-daurāñ meñ zinda rahne kī

tumhī se daad milī hai zarā Thahar jaao

ye baat tum se koī aur kah nahīñ saktā

ye baat dil ne kahī hai zarā Thahar jaao

tumhāre jaane ke ehsās ne jo baḳhshā hai

vo zaḳhm taaza abhī hai zarā Thahar jaao

ye raat sirf mah-o-kahkashāñ kī raat nahīñ

ye raat tum se sajī hai zarā Thahar jaao

zabāñ kalām kī lazzat se kyuuñ rahe mahrūm

nazar nazar se milī hai zarā Thahar jaao

phir ab na tum se jo ham mil sake to kyā hogā

hayāt soch rahī hai zarā Thahar jaao

chaman se duur nasheman kī fikr kyā ki abhī

taḌap ke barq girī hai zarā Thahar jaao

tilism-e-aish tumhārī qasam nahīñ TuuTā

fareb-e-ḳhvāb vahī hai zarā Thahar jaao

ilāj-e-gardish-e-ayyām ke liye 'shaukat'

tamām umr paḌī hai zarā Thahar jaao

shuur-e-kaif-o-KHushi hai zara Thahr jao

wufur-e-gham mein kami hai zara Thahar jao

natija johd-e-musalsal ka aage kya hoga

mahall-e-fikr yahi hai zara Thahar jao

kashakash-e-gham-e-dauran mein zinda rahne ki

tumhi se dad mili hai zara Thahar jao

ye baat tum se koi aur kah nahin sakta

ye baat dil ne kahi hai zara Thahar jao

tumhaare jaane ke ehsas ne jo baKHsha hai

wo zaKHm taza abhi hai zara Thahar jao

ye raat sirf mah-o-kahkashan ki raat nahin

ye raat tum se saji hai zara Thahar jao

zaban kalam ki lazzat se kyun rahe mahrum

nazar nazar se mili hai zara Thahar jao

phir ab na tum se jo hum mil sake to kya hoga

hayat soch rahi hai zara Thahar jao

chaman se dur nasheman ki fikr kya ki abhi

taDap ke barq giri hai zara Thahar jao

tilism-e-aish tumhaari qasam nahin TuTa

fareb-e-KHwab wahi hai zara Thahar jao

ilaj-e-gardish-e-ayyam ke liye 'shaukat'

tamam umr paDi hai zara Thahar jao