ilzam ek ye bhi uTha lena chahiye

ilzām ek ye bhī uThā lenā chāhiye

is shahr-e-be-amāñ ko bachā lenā chāhiye

ye zindagī kī āḳhirī shab hī na ho kahīñ

jo so ga.e haiñ un ko jagā lenā chāhiye

vo kis taraf chalā hai lagā.e koī surāġh

maiñ kis taraf ravāñ huuñ patā lenā chāhiye

yaanī qimār-e-ishq meñ kyā kuchh hai daav par

is rāz-e-vā-shagāf ko pā lenā chāhiye

kaisā hai kaun ye to nazar aa sake kahīñ

parda ye darmiyāñ se haTā lenā chāhiye

dil par jo yādgār rahe us ke makr kī

aisā bhī koī naqsh banā lenā chāhiye

is tarah bhī chalā hai kabhī kārobār-e-shauq

rūThe koī to us ko manā lenā chāhiye

kījiye na kyuuñ mutālba-e-vasl ai 'zafar'

kī hai vafā to is kā sila lenā chāhiye

ilzam ek ye bhi uTha lena chahiye

is shahr-e-be-aman ko bacha lena chahiye

ye zindagi ki aaKHiri shab hi na ho kahin

jo so gae hain un ko jaga lena chahiye

wo kis taraf chala hai lagae koi suragh

main kis taraf rawan hun pata lena chahiye

yani qimar-e-ishq mein kya kuchh hai daw par

is raaz-e-wa-shagaf ko pa lena chahiye

kaisa hai kaun ye to nazar aa sake kahin

parda ye darmiyan se haTa lena chahiye

dil par jo yaadgar rahe us ke makr ki

aisa bhi koi naqsh bana lena chahiye

is tarah bhi chala hai kabhi karobar-e-shauq

ruThe koi to us ko mana lena chahiye

kijiye na kyun mutalba-e-wasl ai 'zafar'

ki hai wafa to is ka sila lena chahiye