in aankhon ne kya kya tamasha na dekha

in āñkhoñ ne kyā kyā tamāshā na dekhā

haqīqat meñ jo dekhnā thā na dekhā

tujhe dekh kar vo duī uTh ga.ī hai

ki apnā bhī saanī na dekhā na dekhā

un āñkhoñ ke qurbān jā.ūñ jinhoñ ne

hazāroñ hijāboñ meñ parvāna dekhā

na himmat na qismat na dil hai na āñkheñ

na DhūñDā na paayā na samjhā na dekhā

marīzān-e-ulfat kī kyā be-kasī hai

masīhā ko bhī chāra-farmā na dekhā

bahut dard-mandoñ ko dekhā hai tū ne

ye siina ye dil ye kalejā na dekhā

vo kab dekh saktā hai us kī tajallī

jis insān ne apnā hī jalvā na dekhā

bahut shor sunte the is anjuman kā

yahāñ aa ke jo kuchh sunā thā na dekhā

safā.ī hai bāġh-e-mohabbat meñ aisī

ki bād-e-sabā ne bhī tinkā na dekhā

use dekh kar aur ko phir jo dekhe

koī dekhne vaalā aisā na dekhā

vo thā jalva-ārā magar tū ne muusā

na dekhā na dekhā na dekhā na dekhā

gayā kārvāñ chhoḌ kar mujh ko tanhā

zarā mere aane kā rastā na dekhā

kahāñ naqsh-e-avval kahāñ naqsh-e-sānī

ḳhudā kī ḳhudā.ī meñ tujh sā na dekhā

tirī yaad hai yā hai terā tasavvur

kabhī 'dāġh' ko ham ne tanhā na dekhā

in aankhon ne kya kya tamasha na dekha

haqiqat mein jo dekhna tha na dekha

tujhe dekh kar wo dui uTh gai hai

ki apna bhi sani na dekha na dekha

un aankhon ke qurban jaun jinhon ne

hazaron hijabon mein parwana dekha

na himmat na qismat na dil hai na aankhen

na DhunDa na paya na samjha na dekha

marizan-e-ulfat ki kya be-kasi hai

masiha ko bhi chaara-farma na dekha

bahut dard-mandon ko dekha hai tu ne

ye sina ye dil ye kaleja na dekha

wo kab dekh sakta hai us ki tajalli

jis insan ne apna hi jalwa na dekha

bahut shor sunte the is anjuman ka

yahan aa ke jo kuchh suna tha na dekha

safai hai bagh-e-mohabbat mein aisi

ki baad-e-saba ne bhi tinka na dekha

use dekh kar aur ko phir jo dekhe

koi dekhne wala aisa na dekha

wo tha jalwa-ara magar tu ne musa

na dekha na dekha na dekha na dekha

gaya karwan chhoD kar mujh ko tanha

zara mere aane ka rasta na dekha

kahan naqsh-e-awwal kahan naqsh-e-sani

KHuda ki KHudai mein tujh sa na dekha

teri yaad hai ya hai tera tasawwur

kabhi 'dagh' ko hum ne tanha na dekha