in dinon main ghurbaton ki sham ke manzar mein hun

in dinoñ maiñ ġhurbatoñ kī shaam ke manzar meñ huuñ

merī chhat TuuTī paḌī hai dūsroñ ke ghar meñ huuñ

aa.egā ik din mire uḌne kā mausam aa.egā

bas isī ummīd par maiñ apne bāl-o-par meñ huuñ

jism kī ra.anā.iyoñ meñ DhūñDte ho tum mujhe

aur maiñ kab se tumhārī ruuh ke paikar meñ huuñ

dekhte haiñ sab nazar aatī huiiñ ūñchā.iyāñ

kaun dekhegā mujhe buniyād ke patthar meñ huuñ

aap kyā rokeñgi iz.hār-e-sadāqat se mujhe

aap ko duniyā kā Dar hai maiñ ḳhudā ke Dar meñ huuñ

ai zamāne kal mirī Thokar se bachnā hai tujhe

ittifāqan aaj vaise maiñ tirī Thokar meñ huuñ

maut ban jā.ūñgā terī ai sitamgar dekhnā

mujh pe jo ḳhanjar uThegā maiñ usī ḳhanjar meñ huuñ

nafratoñ kī ik dahaktī aag hai chāroñ taraf

maiñ fasād-e-shahr ke jalte hue manzar meñ huuñ

sochtā huuñ ye bhī kaisī bad-nasībī hai 'zafar'

maiñ bahādur ho ke bhī haare hue lashkar meñ huuñ

in dinon main ghurbaton ki sham ke manzar mein hun

meri chhat TuTi paDi hai dusron ke ghar mein hun

aaega ek din mere uDne ka mausam aaega

bas isi ummid par main apne baal-o-par mein hun

jism ki ranaiyon mein DhunDte ho tum mujhe

aur main kab se tumhaari ruh ke paikar mein hun

dekhte hain sab nazar aati huin unchaiyan

kaun dekhega mujhe buniyaad ke patthar mein hun

aap kya rokengi izhaar-e-sadaqat se mujhe

aap ko duniya ka Dar hai main KHuda ke Dar mein hun

ai zamane kal meri Thokar se bachna hai tujhe

ittifaqan aaj waise main teri Thokar mein hun

maut ban jaunga teri ai sitamgar dekhna

mujh pe jo KHanjar uThega main usi KHanjar mein hun

nafraton ki ek dahakti aag hai chaaron taraf

main fasad-e-shahr ke jalte hue manzar mein hun

sochta hun ye bhi kaisi bad-nasibi hai 'zafar'

main bahadur ho ke bhi haare hue lashkar mein hun