in donon ghar ka KHana-KHuda kaun ghair hai

in donoñ ghar kā ḳhāna-ḳhudā kaun ġhair hai

shaiḳh-e-haram abas the inkār-e-dair hai

ai yār-e-be-ḳhabar tū mirī le na le ḳhabar

vird-e-zabāñ tirā hī mujhe zikr-e-ḳhair hai

ġhībat meñ kyā ta.alluq use yaad se mirī

kuchh kaam us kā aTkā bhalā mujh baġhair hai

parvā hai kab use mire raf.a-e-malāl se

gah shāġhil-e-shikār kabhī gasht-e-sair hai

be-vaj.h kyā haiñ ham se ye be-rūiyāñ tirī

kyā ham meñ aur tujh meñ kisī rū se bair hai

insān rakkhe ishq kī nisbat se imtiyāz

yuuñ qaid-e-ḳhvāb-o-ḳhur meñ to har vahsh-o-tair hai

apnī galī meñ dekh ke 'hasrat' ko bolā yaar

chal jā pare ho duur agar terī ḳhair hai

in donon ghar ka KHana-KHuda kaun ghair hai

shaiKH-e-haram abas the inkar-e-dair hai

ai yar-e-be-KHabar tu meri le na le KHabar

wird-e-zaban tera hi mujhe zikr-e-KHair hai

ghibat mein kya talluq use yaad se meri

kuchh kaam us ka aTka bhala mujh baghair hai

parwa hai kab use mere rafa-e-malal se

gah shaghil-e-shikar kabhi gasht-e-sair hai

be-wajh kya hain hum se ye be-ruiyan teri

kya hum mein aur tujh mein kisi ru se bair hai

insan rakkhe ishq ki nisbat se imtiyaz

yun qaid-e-KHwab-o-KHur mein to har wahsh-o-tair hai

apni gali mein dekh ke 'hasrat' ko bola yar

chal ja pare ho dur agar teri KHair hai