inko KHala mein koi nazar aana chahiye

in ko ḳhalā meñ koī nazar aanā chāhiye

āñkhoñ ko TuuTe ḳhvāb kā harjāna chāhiye

vo kaam rah ke shahr meñ karnā paḌā hameñ

majnūñ ko jis ke vāste vīrāna chāhiye

hai hijr to kabāb na khāne se kyā husūl

gar ishq hai to kyā hameñ mar jaanā chāhiye

is zaḳhm-e-dil pe aaj bhī surḳhī ko dekh kar

itrā rahe haiñ ham hameñ itrānā chāhiye

dānā.iyāñ bhī ḳhuub haiñ lekin agar mile

dhoka hasīn sā to use khānā chāhiye

tanhā.iyoñ pe apnī nazar kar zarā kabhī

ai bevaqūf dil tujhe ghabrānā chāhiye

is shā.irī meñ kuchh nahīñ naqqād ke liye

dildār chāhiye koī dīvāna chāhiye

in ko KHala mein koi nazar aana chahiye

aankhon ko TuTe KHwab ka harjaana chahiye

wo kaam rah ke shahr mein karna paDa hamein

majnun ko jis ke waste virana chahiye

hai hijr to kabab na khane se kya husul

gar ishq hai to kya hamein mar jaana chahiye

is zaKHm-e-dil pe aaj bhi surKHi ko dekh kar

itra rahe hain hum hamein itrana chahiye

danaiyan bhi KHub hain lekin agar mile

dhoka hasin sa to use khana chahiye

tanhaiyon pe apni nazar kar zara kabhi

ai bewaquf dil tujhe ghabrana chahiye

is shairi mein kuchh nahin naqqad ke liye

dildar chahiye koi diwana chahiye