in talKH aansuon ko na yun munh bana ke pi

in talḳh āñ.suoñ ko na yuuñ muñh banā ke pī

ye mai hai ḳhud-kashīd ise muskurā ke pī

utreñge kis ke halq se ye dil-ḳharāsh ghūñT

kis ko payām duuñ ki mire saath aa ke pī

mashrūb-e-jam hī talḳhi-e-ġham kā ilaaj hai

shīrīnī-e-kalām zarā sī milā ke pī

vaa.iz kī ab na maan agar jaan hai aziiz

is daur meñ ye chiiz ba-taur ik davā ke pī

bhar le piyāla ḳhum-kada-e-zīst se 'hafīz'

ḳhūn-e-jigar hai sāmne chal kar ḳhudā ke pī

in talKH aansuon ko na yun munh bana ke pi

ye mai hai KHud-kashid ise muskura ke pi

utrenge kis ke halq se ye dil-KHarash ghunT

kis ko payam dun ki mere sath aa ke pi

mashrub-e-jam hi talKHi-e-gham ka ilaj hai

shirini-e-kalam zara si mila ke pi

waiz ki ab na man agar jaan hai aziz

is daur mein ye chiz ba-taur ek dawa ke pi

bhar le piyala KHum-kada-e-zist se 'hafiz'

KHun-e-jigar hai samne chal kar KHuda ke pi