inkar bane ya koi iqrar tamasha

inkār bane yā koī iqrār tamāsha

maiñ dekhtā rahtā huuñ lagātār tamāsha

maiñ ḳhud se jhagaḌne meñ huuñ masrūf mire dost

aur dekh rahe haiñ dar-o-dīvār tamāsha

hamdardiyāñ lāzim haiñ mire saath ki ab maiñ

bantā huuñ mohabbat meñ ka.ī baar tamāsha

har aadmī aatā nahīñ rusvā.ī kī zad meñ

bāzār meñ bantā hai ḳharīdār tamāsha

dukh ye hai ki milne ko maiñ bechain bahut huuñ

aur dekh rahe haiñ mirī sarkār tamāsha

ham dekhte rahte haiñ darāmā.ī mohabbat

karte haiñ yahāñ roz adākār tamāsha

hālāt badal sakte haiñ 'mannān' kisī vaqt

ban jā.eñge ab sāhab-e-dastār tamāsha

inkar bane ya koi iqrar tamasha

main dekhta rahta hun lagatar tamasha

main KHud se jhagaDne mein hun masruf mere dost

aur dekh rahe hain dar-o-diwar tamasha

hamdardiyan lazim hain mere sath ki ab main

banta hun mohabbat mein kai bar tamasha

har aadmi aata nahin ruswai ki zad mein

bazar mein banta hai KHaridar tamasha

dukh ye hai ki milne ko main bechain bahut hun

aur dekh rahe hain meri sarkar tamasha

hum dekhte rahte hain daramai mohabbat

karte hain yahan roz adakar tamasha

haalat badal sakte hain 'mannan' kisi waqt

ban jaenge ab sahab-e-dastar tamasha