inkar humse ghair se iqrar bas ji bas

inkār ham se ġhair se iqrār bas jī bas

dekhe tumhāre ham ne ye atvār bas jī bas

itnā huuñ jā-e-rahm jo kartā hai vo jafā

to us se ro ke kahte haiñ aġhyār bas jī bas

saaqī hameñ pilā.iye yuuñ jaam pai-ba-pai

jo ham-nashīn kah uTheñ yak-bār bas jī bas

huuñ nā-umīd vasl se yuuñ jaise vaqt-e-naza.a

ro kar kahe tabīb se bīmār bas jī bas

ġhash huuñ maiñ vaqt-e-bosa jo kahtā hai hañs ke vo

muñh ko haTā haTā ke ba-takrār bas jī bas

us kā jo bas jī bas mujhe yaad aave hai to aah

pahroñ talak maiñ kahtā huuñ har baar bas jī bas

kal vo jo bolā Tuk to kahā ham ne muñh phirā

ḳhair ab na ham se boliye zinhār bas jī bas

ham dil lagā ke tum se hue yaañ talak ba-tañg

jo apne jī se kahte haiñ lāchār bas jī bas

sun kar kahā ki kyā mire lagtī hai dil meñ aag

shikva se jab kare hai tū iz.hār bas jī bas

aise tamāñche māruñgā muñh meñ tire 'nazīr'

gar tū ne mujh se phir kahā ek baar bas jī bas

inkar hum se ghair se iqrar bas ji bas

dekhe tumhaare hum ne ye atwar bas ji bas

itna hun ja-e-rahm jo karta hai wo jafa

to us se ro ke kahte hain aghyar bas ji bas

saqi hamein pilaiye yun jam pai-ba-pai

jo ham-nashin kah uThen yak-bar bas ji bas

hun na-umid wasl se yun jaise waqt-e-naza

ro kar kahe tabib se bimar bas ji bas

ghash hun main waqt-e-bosa jo kahta hai hans ke wo

munh ko haTa haTa ke ba-takrar bas ji bas

us ka jo bas ji bas mujhe yaad aawe hai to aah

pahron talak main kahta hun har bar bas ji bas

kal wo jo bola Tuk to kaha hum ne munh phira

KHair ab na hum se boliye zinhaar bas ji bas

hum dil laga ke tum se hue yan talak ba-tang

jo apne ji se kahte hain lachaar bas ji bas

sun kar kaha ki kya mere lagti hai dil mein aag

shikwa se jab kare hai tu izhaar bas ji bas

aise tamanche marunga munh mein tere 'nazir'

gar tu ne mujh se phir kaha ek bar bas ji bas