inkar kise, auj-e-qamar tak nahin pahuncha

inkār kise, auj-e-qamar tak nahīñ pahuñchā

insān magar dil ke nagar tak nahīñ pahuñchā

uTThā to har ik jhuktī huī shāḳh kī jānib

haath apnā kisī shāḳh-e-samar tak nahīñ pahuñchā

tūfān kī zad par hai agar shahr use kyā

vo ḳhush hai ki paanī abhī ghar tak nahīñ pahuñchā

har raah liye jaatī hai ik band galī tak

rasta koī us shoḳh ke dar tak nahīñ pahuñchā

dam bhartā rahā apnī vafāoñ kā jo 'muḳhlis'

vo shaḳhs to lene ko ḳhabar tak nahīñ pahuñchā

inkar kise, auj-e-qamar tak nahin pahuncha

insan magar dil ke nagar tak nahin pahuncha

uTTha to har ek jhukti hui shaKH ki jaanib

hath apna kisi shaKH-e-samar tak nahin pahuncha

tufan ki zad par hai agar shahr use kya

wo KHush hai ki pani abhi ghar tak nahin pahuncha

har rah liye jati hai ek band gali tak

rasta koi us shoKH ke dar tak nahin pahuncha

dam bharta raha apni wafaon ka jo 'muKHlis'

wo shaKHs to lene ko KHabar tak nahin pahuncha