inqilab-e-dahr ruk ruk kar jawan banta gaya

inqilāb-e-dahr ruk ruk kar javāñ bantā gayā

jo subuk-sar thā vahī sañg-e-garāñ bantā gayā

naġhma-e-dil jab baḌhā āh-o-fuġhāñ bantā gayā

āsmāñ ik aur zer-e-āsmāñ bantā gayā

jaane kyā bhar dī haiñ us ne is chaman meñ shoḳhiyāñ

jo bhī aayā vo chaman kā rāz-dāñ bantā gayā

har-nafas ko apnī manzil kā pata miltā nahīñ

jo jahāñ Thahrāv haiñ ik kārvāñ bantā gayā

sard aahoñ kā tasarruf ho to soz-e-dil kahāñ

dil se jo sho.ala uThā vo bhī dhuāñ bantā gayā

be-sabab hotā nahīñ jazbāt-e-dil kā valvala

jis ne samjhā aa.ī apnā rāz-dāñ bantā gayā

kuchh bahāroñ meñ ḳhizāñ hai kuchh ḳhizāñ meñ hai bahār

phuul murjhā.e to ġhuncha gulsitāñ bantā gayā

aadmī kī asliyat ko aadmī samjhā nahīñ

ek qatra thā jo bahr-e-be-karāñ bantā gayā

ham to baiThe hī rahe apnī asīrī ko liye

banñe vaalā kaam be-vahm-o-gumāñ bantā gayā

'mīr'-o-'ġhālib' se baḌhe to hazrat-e-iqbāl tak

shaġhl she'r-o-shā'erī kā jāvedāñ bantā gayā

dahr meñ ye bhī to haiñ qānūn-e-fitrat ke usuul

jo nazar se gir gayā vo dilsitāñ bantā gayā

barq kī sar-garmiyāñ tasnīm phir bhī ai 'kalīm'

bijliyāñ girtī raheñ aur āshiyāñ bantā gayā

inqilab-e-dahr ruk ruk kar jawan banta gaya

jo subuk-sar tha wahi sang-e-garan banta gaya

naghma-e-dil jab baDha aah-o-fughan banta gaya

aasman ek aur zer-e-asman banta gaya

jaane kya bhar di hain us ne is chaman mein shoKHiyan

jo bhi aaya wo chaman ka raaz-dan banta gaya

har-nafas ko apni manzil ka pata milta nahin

jo jahan Thahraw hain ek karwan banta gaya

sard aahon ka tasarruf ho to soz-e-dil kahan

dil se jo shoala uTha wo bhi dhuan banta gaya

be-sabab hota nahin jazbaat-e-dil ka walwala

jis ne samjha aai apna raaz-dan banta gaya

kuchh bahaaron mein KHizan hai kuchh KHizan mein hai bahaar

phul murjhae to ghuncha gulsitan banta gaya

aadmi ki asliyat ko aadmi samjha nahin

ek qatra tha jo bahr-e-be-karan banta gaya

hum to baiThe hi rahe apni asiri ko liye

banne wala kaam be-wahm-o-guman banta gaya

'mir'-o-'ghaalib' se baDhe to hazrat-e-iqbaal tak

shaghl she'r-o-sha'eri ka jawedan banta gaya

dahr mein ye bhi to hain qanun-e-fitrat ke usul

jo nazar se gir gaya wo dilsitan banta gaya

barq ki sar-garmiyan tasnim phir bhi ai 'kalim'

bijliyan girti rahen aur aashiyan banta gaya