insan-e-hawas-pesha se kya ho nahin sakta

insān-e-havas-pesha se kyā ho nahīñ saktā

majbūr hai is se ki ḳhudā ho nahīñ saktā

vo uqda mire kaam meñ taqdīr ne Daalā

jo nāḳhun-e-tadbīr se vā ho nahīñ saktā

dahshat se koī naam bhī letā nahīñ varna

is bazm meñ kyā zikr mirā ho nahīñ saktā

kyuuñ kar ho harīs-e-sitam-e-ishq kī serī

ġham rizq-e-muqaddar hai sivā ho nahīñ saktā

dil kyuuñ ki ḳhadañg-e-nigah-e-yār se bach jaa.e

ye tiir qazā kā hai ḳhatā ho nahīñ saktā

tamkīñ se na dekhe jo kabhī aa.ina jhuk kar

vo murtakib-e-sharm-o-hayā ho nahīñ saktā

mātam-zada ke haath se ghabrā na shab-e-vasl

aadat hai ki siine se judā ho nahīñ saktā

kahne pe chale dil ke abas ye bhī na jaanā

gumrāh kabhī rāh-numā ho nahīñ saktā

hai chaal tirī bā.is-e-āsūdgī-e-halq

ḳhajlat ke sabab hashr bapā ho nahīñ saktā

ye dard hai terā hī ki hai jaan se shīrīñ

har dard meñ zālim ye mazā ho nahīñ saktā

ai tā.ir-e-jāñ shikva-e-taklīf-e-qafas kyuuñ

kyā tū qafas-e-tan se rihā ho nahīñ saktā

ġhairat hai jo mujh meñ to vo kahte haiñ sar-e-bazm

parvāne se jo kaam huā ho nahīñ saktā

vo ġham-zada bante haiñ mirī na.ash pe lekin

dil-ḳhush hai ki lab nauha-sarā ho nahīñ saktā

ham zamzama-sanj-e-arnī ban nahīñ sakte

tū baam pe kyā jalva-numā ho nahīñ saktā

maiñ is qadar achchhā to nahīñ huuñ ki bahar aa.uuñ

mansūr ne da.avā jo kiyā ho nahīñ saktā

maiñ us nigah-e-nāz kā mahkūm huuñ 'sālik'

vābasta-e-ahkām-e-qazā ho nahīñ saktā

insan-e-hawas-pesha se kya ho nahin sakta

majbur hai is se ki KHuda ho nahin sakta

wo uqda mere kaam mein taqdir ne Dala

jo naKHun-e-tadbir se wa ho nahin sakta

dahshat se koi nam bhi leta nahin warna

is bazm mein kya zikr mera ho nahin sakta

kyun kar ho haris-e-sitam-e-ishq ki seri

gham rizq-e-muqaddar hai siwa ho nahin sakta

dil kyun ki KHadang-e-nigah-e-yar se bach jae

ye tir qaza ka hai KHata ho nahin sakta

tamkin se na dekhe jo kabhi aaina jhuk kar

wo murtakib-e-sharm-o-haya ho nahin sakta

matam-zada ke hath se ghabra na shab-e-wasl

aadat hai ki sine se juda ho nahin sakta

kahne pe chale dil ke abas ye bhi na jaana

gumrah kabhi rah-numa ho nahin sakta

hai chaal teri bais-e-asudgi-e-halq

KHajlat ke sabab hashr bapa ho nahin sakta

ye dard hai tera hi ki hai jaan se shirin

har dard mein zalim ye maza ho nahin sakta

ai tair-e-jaan shikwa-e-taklif-e-qafas kyun

kya tu qafas-e-tan se riha ho nahin sakta

ghairat hai jo mujh mein to wo kahte hain sar-e-bazm

parwane se jo kaam hua ho nahin sakta

wo gham-zada bante hain meri nash pe lekin

dil-KHush hai ki lab nauha-sara ho nahin sakta

hum zamzama-sanj-e-arni ban nahin sakte

tu baam pe kya jalwa-numa ho nahin sakta

main is qadar achchha to nahin hun ki bahar aaun

mansur ne dawa jo kiya ho nahin sakta

main us nigah-e-naz ka mahkum hun 'salik'

wabasta-e-ahkaam-e-qaza ho nahin sakta