is aarzi duniya mein har baat adhuri hai

is aarzī duniyā meñ har baat adhūrī hai

har jiit hai lā-hāsil har maat adhūrī hai

kuchh der kī rim-jhim ko ma.alūm nahīñ shāyad

jal-thal na ho āñgan to barsāt adhūrī hai

kyā ḳhuub tamāsha hai ye kār-gah-e-hastī

har jism salāmat hai har zaat adhūrī hai

mahrūm-e-tamāzat din shab meñ bhī nahīñ ḳhunkī

ye kaisā ta.alluq hai har baat adhūrī hai

is aarzi duniya mein har baat adhuri hai

har jit hai la-hasil har mat adhuri hai

kuchh der ki rim-jhim ko malum nahin shayad

jal-thal na ho aangan to barsat adhuri hai

kya KHub tamasha hai ye kar-gah-e-hasti

har jism salamat hai har zat adhuri hai

mahrum-e-tamazat din shab mein bhi nahin KHunki

ye kaisa talluq hai har baat adhuri hai