is ada se wo jafa karte hain

is adā se vo jafā karte haiñ

koī jaane ki vafā karte haiñ

yuuñ vafā ahd-e-vafā karte haiñ

aap kyā kahte haiñ kyā karte haiñ

ham ko chheḌoge to pachhtāoge

hañsne vāloñ se hañsā karte haiñ

nāma-bar tujh ko salīqa hī nahīñ

kaam bātoñ meñ banā karte haiñ

chaliye āshiq kā janāza uTThā

aap baiThe hue kyā karte haiñ

ye batātā nahīñ koī mujh ko

dil jo aatā hai to kyā karte haiñ

husn kā haq nahīñ rahtā baaqī

har adā meñ vo adā karte haiñ

tiir āḳhir badal-e-kāfir hai

ham aḳhīr aaj duā karte haiñ

rote haiñ ġhair kā ronā pahroñ

ye hañsī mujh se hañsā karte haiñ

is liye dil ko lagā rakkhā hai

is meñ mahbūb rahā karte haiñ

tum miloge na vahāñ bhī ham se

hashr se pahle gila karte haiñ

jhāñk kar rauzan-e-dar se mujh ko

kyā vo shoḳhī se hayā karte haiñ

us ne ehsān jatā kar ye kahā

aap kis muñh se gila karte haiñ

roz lete haiñ nayā dil dilbar

nahīñ mālūm ye kyā karte haiñ

'dāġh' tū dekh to kyā hotā hai

jabr par sabr kiyā karte haiñ

is ada se wo jafa karte hain

koi jaane ki wafa karte hain

yun wafa ahd-e-wafa karte hain

aap kya kahte hain kya karte hain

hum ko chheDoge to pachhtaoge

hansne walon se hansa karte hain

nama-bar tujh ko saliqa hi nahin

kaam baaton mein bana karte hain

chaliye aashiq ka janaza uTTha

aap baiThe hue kya karte hain

ye batata nahin koi mujh ko

dil jo aata hai to kya karte hain

husn ka haq nahin rahta baqi

har ada mein wo ada karte hain

tir aaKHir badal-e-kafir hai

hum aKHir aaj dua karte hain

rote hain ghair ka rona pahron

ye hansi mujh se hansa karte hain

is liye dil ko laga rakkha hai

is mein mahbub raha karte hain

tum miloge na wahan bhi hum se

hashr se pahle gila karte hain

jhank kar rauzan-e-dar se mujh ko

kya wo shoKHi se haya karte hain

us ne ehsan jata kar ye kaha

aap kis munh se gila karte hain

roz lete hain naya dil dilbar

nahin malum ye kya karte hain

'dagh' tu dekh to kya hota hai

jabr par sabr kiya karte hain