is be-basarati mein bhi ye guf-fishaniyan

is be-basāratī meñ bhī ye guf-fishāniyāñ

kyā khul ga.iiñ dimāġh kī andar ko khiḌkiyāñ

hote haiñ māñgne ke bhī ādāb kuchh miyāñ

ḳhālī paḌī haiñ aql se kitnī hī bastiyāñ

qufl-e-ġham-e-hayāt na TuuTā na dar khulā

ham ne lagā.īñ laakh mohabbat kī chābiyāñ

ehsās rang bhartā hai jab sānehāt meñ

haath aa.ī haiñ to sirf ta.assub kī titliyāñ

ham ko to ḳhār-zāroñ se bhī kad nahīñ koī

phūloñ kī vādiyāñ to haiñ phūloñ kī vādiyāñ

sūraj jo aayā sar pe to saa.e simaT ga.e

jaagī ḳhushī to chhaT ga.iiñ ḳhud hī udāsiyāñ

kuchh baat hai ki zo.af-e-basārat ke ba.ad bhī

'tanhā' ko suujh jaatī haiñ auroñ pe phabtiyāñ

is be-basarati mein bhi ye guf-fishaniyan

kya khul gain dimagh ki andar ko khiDkiyan

hote hain mangne ke bhi aadab kuchh miyan

KHali paDi hain aql se kitni hi bastiyan

qufl-e-gham-e-hayat na TuTa na dar khula

hum ne lagain lakh mohabbat ki chabiyan

ehsas rang bharta hai jab sanehat mein

hath aai hain to sirf tassub ki titliyan

hum ko to KHar-zaron se bhi kad nahin koi

phulon ki wadiyan to hain phulon ki wadiyan

suraj jo aaya sar pe to sae simaT gae

jagi KHushi to chhaT gain KHud hi udasiyan

kuchh baat hai ki zoaf-e-basarat ke baad bhi

'tanha' ko sujh jati hain auron pe phabtiyan