is chaman ka ajib mali hai

is chaman kā ajiib maalī hai

jis ne har shāḳh kaaT Daalī hai

din ujālā gañvā ke baiTh gayā

raat ne raushnī churā lī hai

ġham kī ismat bachchī huī thī magar

vaqt ne vo bhī rauñd Daalī hai

mo.ajiza ho jo bach nikal jaa.e

pāñch shahbāz ek laalī hai

ye tirā adl kyā huā yārab

koī adnā hai koī aalī hai

aañkh meñ chubh ga.e ka.ī manzar

ab kahāñ niiñd aane vaalī hai

pahle vaqtoñ meñ ho to ho shāyad

dostī ab hasīn gaalī hai

ḳhema-e-zabt kī tanābeñ khīñch

kuchh ghaTā sī barasne vaalī hai

chalte rahnā kaThin huā 'hasrat'

paañv zaḳhmī haiñ raat kaalī hai

is chaman ka ajib mali hai

jis ne har shaKH kaT Dali hai

din ujala ganwa ke baiTh gaya

raat ne raushni chura li hai

gham ki ismat bachchi hui thi magar

waqt ne wo bhi raund Dali hai

moajiza ho jo bach nikal jae

panch shahbaz ek lali hai

ye tera adl kya hua yarab

koi adna hai koi aali hai

aankh mein chubh gae kai manzar

ab kahan nind aane wali hai

pahle waqton mein ho to ho shayad

dosti ab hasin gali hai

KHema-e-zabt ki tanaben khinch

kuchh ghaTa si barasne wali hai

chalte rahna kaThin hua 'hasrat'

panw zaKHmi hain raat kali hai