is daur mein har ek tah-e-charKH-e-kuhan luTa

is daur meñ har ik tah-e-charḳh-e-kuhan luTā

auroñ kā zar luTā mirā naqd-e-suḳhan luTā

ḳhalvat-nashīñ ho to dil-e-āshiq meñ kar jagah

yuuñ daulat-e-jamāl na ai sīm-tan luTā

bulbul ko kaisī kaisī huiiñ āfateñ nasīb

gulchīñ ke dast-e-zulm se kyā kyā chaman luTā

fariyād tak ḳhudā se na kī ai sanam tirī

maiñ be-zabāñ tire yahāñ ai be-dahan luTā

nabbash kī jafā.eñ huiiñ ham pe ba.ad-e-marg

ai āsmān zer-e-zamīñ bhī kafan luTā

jhoñke chale havā ke pareshāñ huī vo zulf

ḳhushbū tamām phailī hai mushk-e-ḳhutan luTā

'hātim' vo huuñ ki ba.ad-e-fanā dil ko duuñ salāh

ab qabr meñ bhī ḳhaak uḌāyā kafan luTā

be-dil suḳhan huuñ 'mehr' paḌhūñ sinn-e-īsavī

auroñ kā zar luTā mirā naqd-e-suḳhan luTā

is daur mein har ek tah-e-charKH-e-kuhan luTa

auron ka zar luTa mera naqd-e-suKHan luTa

KHalwat-nashin ho to dil-e-ashiq mein kar jagah

yun daulat-e-jamal na ai sim-tan luTa

bulbul ko kaisi kaisi huin aafaten nasib

gulchin ke dast-e-zulm se kya kya chaman luTa

fariyaad tak KHuda se na ki ai sanam teri

main be-zaban tere yahan ai be-dahan luTa

nabbash ki jafaen huin hum pe baad-e-marg

ai aasman zer-e-zamin bhi kafan luTa

jhonke chale hawa ke pareshan hui wo zulf

KHushbu tamam phaili hai mushk-e-KHutan luTa

'hatim' wo hun ki baad-e-fana dil ko dun salah

ab qabr mein bhi KHak uDaya kafan luTa

be-dil suKHan hun 'mehr' paDhun sinn-e-isawi

auron ka zar luTa mera naqd-e-suKHan luTa