is daur mein sab apna chalan bhul gae hain

is daur meñ sab apnā chalan bhuul ga.e haiñ

had ye hai ki fankār bhī fan bhuul ga.e haiñ

sayyād sunā.eñ tujhe kyūñkar vahī naġhme

ham lahja-e-arbāb-e-chaman bhuul ga.e haiñ

hai apnī jagah aaj bhī har rasm-e-zamāna

lekin hamīñ ā.īn-e-vatan bhuul ga.e haiñ

manzil ke nishāñ mar ke bhī vo pā na sakeñge

jo log rah-e-dār-o-rasan bhuul ga.e haiñ

afsos milā hai unheñ kab izn-e-rihā.ī

jab ahl-e-qafas rāh-e-chaman bhuul ga.e haiñ

kis tarah shikāyat kareñ be-tābī-e-dil kī

kyā ham tire māthe kī shikan bhuul ga.e haiñ

pursāñ nahīñ ġhurbat meñ mirā koī bhī 'kashfī'

shāyad mujhe yārān-e-vatan bhuul ga.e haiñ

is daur mein sab apna chalan bhul gae hain

had ye hai ki fankar bhi fan bhul gae hain

sayyaad sunaen tujhe kyunkar wahi naghme

hum lahja-e-arbab-e-chaman bhul gae hain

hai apni jagah aaj bhi har rasm-e-zamana

lekin hamin aain-e-watan bhul gae hain

manzil ke nishan mar ke bhi wo pa na sakenge

jo log rah-e-dar-o-rasan bhul gae hain

afsos mila hai unhen kab izn-e-rihai

jab ahl-e-qafas rah-e-chaman bhul gae hain

kis tarah shikayat karen be-tabi-e-dil ki

kya hum tere mathe ki shikan bhul gae hain

pursan nahin ghurbat mein mera koi bhi 'kashfi'

shayad mujhe yaran-e-watan bhul gae hain