is dil mein agar jalwa-e-dil-dar na hota

is dil meñ agar jalva-e-dil-dār na hotā

zinhār ye dil maz.har-e-asrār na hotā

hotā na agar jām-e-mai-e-ishq se sarshār

hargiz dil-e-dīvāna ye hoshyār na hotā

hotā na agar us kī mohabbat se sarokār

ye ġham-zada rusvā sar-e-bāzār na hotā

hotī na kabhūñ is dil-e-bīmār ko sehhat

gar lutf-e-masīhā-e-lab-e-yār na hotā

piitā na agar jām-e-mai-e-ishq to hargiz

dil sirr-e-haqīqat se ḳhabar-dār na hotā

hotā na agar ā.īna-e-jalva-e-dildār

dil mahr-sifat matla-e-anvār na hotā

hotā na agar ishq ko manzūr ye iz.hār

vahdat se ye kasrat ko sarokār na hotā

āgāh haqīqat se na hotā kabhū 'āsim'

ḳhādim kā agar faiz madad-gār na hotā

is dil mein agar jalwa-e-dil-dar na hota

zinhaar ye dil mazhar-e-asrar na hota

hota na agar jam-e-mai-e-ishq se sarshaar

hargiz dil-e-diwana ye hoshyar na hota

hota na agar us ki mohabbat se sarokar

ye gham-zada ruswa sar-e-bazar na hota

hoti na kabhun is dil-e-bimar ko sehhat

gar lutf-e-masiha-e-lab-e-yar na hota

pita na agar jam-e-mai-e-ishq to hargiz

dil sirr-e-haqiqat se KHabar-dar na hota

hota na agar aaina-e-jalwa-e-dildar

dil mahr-sifat matla-e-anwar na hota

hota na agar ishq ko manzur ye izhaar

wahdat se ye kasrat ko sarokar na hota

aagah haqiqat se na hota kabhu 'asim'

KHadim ka agar faiz madad-gar na hota