is ek Dar se KHwab dekhta nahin

is ek Dar se ḳhvāb dekhtā nahīñ

maiñ jo bhī dekhtā huuñ bhūltā nahīñ

kisī muñDer par koī diyā jalā

phir is ke baad kyā huā patā nahīñ

abhī se haath kāñpne lage mire

abhī to maiñ ne vo badan chhuā nahīñ

maiñ aa rahā thā rāste meñ phuul the

maiñ jā rahā huuñ koī roktā nahīñ

tirī taraf chale to umr kaT ga.ī

ye aur baat rāsta kaTā nahīñ

maiñ raah se bhaTak gayā to kyā huā

charāġh mere haath meñ to thā nahīñ

maiñ in dinoñ huuñ ḳhud se itnā be-ḳhabar

maiñ mar chukā huuñ aur mujhe patā nahīñ

us azhdahe kī aañkh pūchhtī rahī

kisī ko ḳhauf aa rahā hai yā nahīñ

ye ishq bhī ajab ki ek shaḳhs se

mujhe lagā ki ho gayā huā nahīñ

ḳhudā kare vo peḌ ḳhairiyat se ho

ka.ī dinoñ se us kā rābta nahīñ

is ek Dar se KHwab dekhta nahin

main jo bhi dekhta hun bhulta nahin

kisi munDer par koi diya jala

phir is ke baad kya hua pata nahin

abhi se hath kanpne lage mere

abhi to main ne wo badan chhua nahin

main aa raha tha raste mein phul the

main ja raha hun koi rokta nahin

teri taraf chale to umr kaT gai

ye aur baat rasta kaTa nahin

main rah se bhaTak gaya to kya hua

charagh mere hath mein to tha nahin

main in dinon hun KHud se itna be-KHabar

main mar chuka hun aur mujhe pata nahin

us azhdahe ki aankh puchhti rahi

kisi ko KHauf aa raha hai ya nahin

ye ishq bhi ajab ki ek shaKHs se

mujhe laga ki ho gaya hua nahin

KHuda kare wo peD KHairiyat se ho

kai dinon se us ka rabta nahin